Astanada «Mádenı mura» baǵdarlamasyn iske asyrý jónindegi qoǵamdyq keńestiń keńeıtilgen qorytyndy otyrysy ótýde

Búgin qoǵamdyq keńes músheleri qorytyndy májilistiń aldynda sońǵy 8 jyl ishinde «Mádenı mura» baǵdarlamasynyń aıasynda qol jetkizilgen jetistikterge arnalǵan kórmeni tamashalady.

Qoǵamdyq keńestiń májilisine keńes múshelerimen qatar Parlament depýtattary men aqyn-jazýshylar, qoǵam jáne mádenıet qaıratkerleri, mınıstrler men vedomstvo basshylary qatysýda. Búgin osy otyrys barysynda Memleket basshysynyń bastamasymen qolǵa alynyp, 8 jyldan beri júzege asyrylyp kele jatqan «Mádenı mura» baǵdarlamasynyń jetistikterine toqtalǵan Memlekettik hatshy Qanat Saýdabaevtyń aıtýynsha, atalmysh baǵdarlamanyń qorytyndy otyrysyn ótkizýdiń máni zor.

«Jahandyq qarjylyq daǵdarystarǵa, memleketti qalyptastyrý jolyndaǵy qıyn-qystaý jyldarǵa qaramastan, halyqtyń rýhanı damýy men tarıhı sanasyn jańǵyrtý isi Elbasynyń udaıy qamqorlyǵy men nazarynda boldy. Tuńǵysh Prezıdentimiz Nursultan Nazarbaevtyń kóshbasshylyǵymen táýelsiz Qazaqstannyń qol jetkizgen áleýmettik-ekonomıkalyq, mádenı-gýmanıtarlyq jáne qoǵamdyq-saıası damýyndaǵy tabystarmen qatar halyqtyń mádenı órleýi men rýhanı jańǵyrýyndaǵy jetistikter shyn máninde maqtan tutýǵa laıyq»,-dep atap kórsetti Memlekettik hatshy.

Sondaı-aq jıyn barysynda «Mádenı mura» baǵdarlamasy aıasynda atqarylǵan sharalardyń qorytyndysynan derekter keltirildi. Baǵdarlama júzege asyrylǵan 2004-2011 jyldar aralyǵynda elde 93 tarıhı jáne mádenı nysandar jóndelip, onyń 73-i tolyq jóndeýden ótken. Osy ýaqyt aralyǵynda mazmunymen jáne polıgrafııalyq sapasymen erekshelenetin ondaǵan kitaptar jaryq kórgen. Mádenı jáne tarıhı eskertkishter aımaǵynda 37 arheologııalyq qazba jumystary júrgizilip, 33 qoldanbaly zertteýler jasalǵan. Buǵan qosa alys jáne jaqyn shet memleketterdiń muraǵattarynan halqymyzdyń tarıhy, etnografııasy, jáne ónerine qatysty 5 myńǵa jýyq qoljazbalar ákelingen.