Astanada LRT júıesine qyzmetkerlerdi qabyldaý bastaldy

ASTANA. KAZINFORM — Astanada jeńil relsti kólik júıesin iske qosýǵa daıyndyq aıasynda CTS platforma boıynsha kezekshi jáne LRT kassıri laýazymdaryna qyzmetkerlerdi qabyldaý jarııalady.

Astana ákimdiginiń málimetinshe, platforma boıynsha kezekshi laýazymyna joǵary bilimi bar (mamandyqqa qoıylatyn talaptar joq) nemese orta arnaýly bilimi bar kandıdattar qarastyrylady. Kólik salasyndaǵy jumys ótili keminde 6 aı bolýy tıis, memlekettik jáne orys tilderin bilý mindetti, aǵylshyn tilin bilý quptalady.

Mindetteri:

* jolaýshylarǵa qyzmet kórsetýdi uıymdastyrý, jolaýshylarǵa arnalǵan jabdyqtardyń jumysyn baqylaý;
* jolaýshylar aǵynyn retteý jáne platformada qoǵamdyq tártipti saqtaý.

Kandıdattarǵa usynylady:

* jumys berýshi esebinen Astana qalasynda 1 aı merzimge oqytý;
* Qazaqstan Respýblıkasynyń Eńbek kodeksine sáıkes resmı jumysqa ornalastyrý;
* oqytý kezeńinde – bes kúndik jumys aptasy;
* jumysqa qabyldanǵannan keıin – aýysymdyq jumys kestesi.

LRT kassıri laýazymyna úmitkerlerge qoıylatyn biliktilik talaptary:

* joǵary nemese orta arnaýly bilim (býhgalterııa, qarjy, ekonomıka, gýmanıtarlyq baǵyttar);
* mamandyǵy boıynsha jumys ótili keminde 2 jyl;
* «1S: Býhgalterııa» baǵdarlamasymen jumys isteý daǵdylary;
* eseptilik jasaý daǵdylary;
* memlekettik jáne orys tilderin bilý, aǵylshyn tilin bilý quptalady.

Kassırdiń mindetterine LRT paıdalaný qaǵıdalaryn, tarıfterdi, jeńildikter men jol júrý sharttaryn túsindirý; belgilengen tarıfterge sáıkes avtobýstarda jol júrýge arnalǵan kólik kartalaryn satý jáne tolyqtyrý; kassalyq eseptilikti júrgizý kiredi.

Aıta ketelik Astanadaǵy LRT bıyl synaqtan ótkennen keıin paıdalanýǵa beriledi.