Astanada LRT júıesi kóktemde iske qosylady
ASTANA. KAZINFORM — Qazaqstan Respýblıkasy Premer-mınıstriniń birinshi orynbasary Roman Sklıar Astana qalasynyń ákimi Jeńis Qasymbekpen birge LRT deposynyń ǵımaratyna baryp, jeńil relsti kólik jobasyn júzege asyrý aıasynda qurylyp jatqan Biryńǵaı dıspetcherlik ortalyqtyń jumysqa daıyndyq barysymen tanysty. Bul týraly Úkimettiń baspasóz qyzmeti málim etti.
Depo quramynda jalpy aýdany 768 m² bolatyn Biryńǵaı dıspetcherlik ortalyq (protsessıngtik ortalyq) qalyptastyrylýda. Bul ortalyq júıeni basqarý men qalanyń jol-kóshe jelisindegi úderisterdi úılestirýdiń negizgi elementine aınalady.
Ortalyqtyń fýnktsıonalyna LRT quramdarynyń qozǵalysyn basqarý, ıntellektýaldy kólik júıesiniń baǵdarsham nysandaryn úılestirý, qoǵamdyq kólikti dıspetcherlik súıemeldeý, velosıpedti jalǵa berý júıesin dıspetcherleý, sondaı-aq kólik derekterin óńdeý jáne analıtıkalyq taldaý kiredi. Qalalyq qyzmettermen ıntegratsııa basqarýdy ortalyqtandyrýǵa, shtattan tys jaǵdaılarǵa den qoıý kezinde vedomstvoaralyq ózara is-qımyl jyldamdyǵyn arttyrýǵa múmkindik beredi.
Aralaý barysynda «Áýejaı» (101), «Báıterek» (112), «Mınıstrlikter úıi» (113) stansalary da qaraldy.
Synaqtyq paıdalaný bekitilgen synaq baǵdarlamasyna sáıkes búkil jeli boıynsha júrgizilip otyr. Synaq kezeńiniń mindetterine qaraı poıyzdar toqtaýsyz ótýi múmkin nemese barlyq stansalarda toqtap, esikterdiń sınhrondalýyn, pozıtsııalaý júıelerin, toqtaý dáldigin jáne borttyq ári stansalyq basqarý júıeleriniń ózara árekettesýin tekseredi.
— Synaqtyq paıdalaný táýliktiń kez kelgen ýaqytynda, sonyń ishinde túngi mezgilde de júzege asyrylady. Synaqtardyń uzaqtyǵy táýligine 12 saǵattan asady. LRT quramdary pılotsyz rejımde (GoA4) qatynaıdy. Synaqtar ınfraqurylym men qaýipsizdik júıelerin tekserýdi, sondaı-aq personaldy daıarlaýdy jáne apattyq rásimderdi pysyqtaýdy qamtıdy. Quramdar Ortalyq Azııanyń klımatyna beıimdelgen, tómen temperatýra men muzdanýǵa tózimdi, — delingen habarlamada.
Tehnologııalyq sheshimder. Qozǵalmaly quram dóńgelekteriniń konstrýktsııasynda serpimdi elementter qoldanylǵan: bandaj ben dóńgelek dıskisiniń arasyna dirildi oqshaýlaý qyzmetin atqaratyn rezeńke tósem qarastyrylǵan. Bul sheshim dınamıkalyq júktemeler men qurylymdyq shýdyń berilýin azaıtyp, poıyzdar qozǵalǵan kezdegi akýstıkalyq áser deńgeıin tómendetedi. Boljamdy paıdalaný parametrleri.
Qozǵalys aralyǵy: 5-ten 10 mınýtqa deıin (ýchaskege baılanysty); Stansalar arasyndaǵy júrip ótý ýaqyty: 1,5–3 mınýt; «Nurly jol» stansasynan «Áýejaı» stansasyna deıingi júrý ýaqyty — shamamen 40 mınýt.
Synaqtyq paıdalanýdy aıaqtaý jáne jolaýshylar qozǵalysyn bastaý kúni barlyq is-sharalar kesheni tolyq oryndalyp, júıeniń belgilengen tehnıkalyq talaptarǵa sáıkestigi rastalǵannan keıin anyqtalatyn bolady. LRT jumysynyń bastalýy jaqyn aılarda (kóktemde) kútiledi.
Buǵan deıin LRT áýejaıdan Nurly jol vokzalyna 40 mınýtta jetetinin jazǵan edik.