Astanada LRT jobasynyń ekinshi kezeńine daıyndyq bastaldy
ASTANA. KAZINFORM — Elordada jeńil relsti kólik (LRT) jobasyn iske asyrýdyń kelesi kezeńi bastaldy. Shyńǵys Aıtmatov kóshesinde LRT jelisiniń ekinshi kezegin salý aıasynda daıyndyq jumystary qolǵa alyndy.
City Transportation Systems kompanııasynyń málimetinshe, qazirgi ýaqytta atalǵan ýchaskede ınjenerlik-geologııalyq zertteý jumystary júrgizilip jatyr.
Mamandar topyraqtyń quramy men qasıetterin zertteýde, bul jobanyń tehnıkalyq-ekonomıkalyq negizdemesi men jobalyq-smetalyq qujattamasyn ázirleý úshin qajet.
Vedomstvo ókilderi bul derekter qajetti tehnıkalyq sheshimderdi anyqtaýǵa jáne bolashaq LRT jelisin jobalaýǵa múmkindik beretinin atap ótti.
Buǵan deıin elordada LRT stantsııalaryna baǵyttaıtyn navıgatsııalyq kórsetkishter ornatylǵan bolatyn.
Eske salaıyq, Astanada 29 qyrkúıekten bastap jeńil relsti kólik júıeleri synaqtan ótkizilip jatyr. Jabdyqtar men ınfraqurylymǵa júrgiziletin keshendi synaq keminde alty aıǵa sozylady.
Aıta ketelik Prezıdent LRT jelisin uzartý jáne Qabanbaı batyr dańǵylynda eki deńgeıli jol salý usynysyn qoldaǵan edi.