Astanada LRT jelisiniń jartysyna jýyǵy daıyn boldy
ASTANA. KAZINFORM — Elordada jeńil relsti kólik (LRT) jelisiniń qurylysy qarqyndy júrip jatyr. Qazir rels jolynyń 11 shaqyrymy tóselip, betonmen nyǵaıtyldy, dep habarlaıdy CTS kólik kompanııasy.
Bul kórsetkish estakadalyq jeliniń jalpy uzyndyǵynyń 50 paıyzyn quraıdy. Sondaı-aq shpal tóseý jáne rels montajdaý jumystary barlyq ýchaskede júrgizilip jatyr.
— Jobalyq kestege sáıkes, qurylys jumystarynyń negizgi nysandary — «Nurly jol» temirjol vokzaly, Astana halyqaralyq áýejaıy, Mınıstrlikter úıi jáne Respýblıkalyq bas meshit aýmaǵynda jalǵasyp jatyr, — delingen habarlamada.
Osylaısha, qurylys jáne ınjenerlik jumystar josparǵa saı júzege asyrylyp keledi. Stantsııa ınfraqurylymyn jabdyqtaý jáne elektrmen qamtamasyz etý júıelerin daıyndaý sharalary qolǵa alynǵan.
Aıta keteıik, Astanadaǵy jeńil relsti kólik jelisin synaq rejıminde iske qosý 2025 jyldyń qyrkúıek aıyna josparlanǵan.
Buǵan deıin, Qytaıdyń Tanshan qalasynda Astana qalasyna arnalǵan LRT vagondarynyń alǵashqy eki quramy jiberilgenin habarlaǵanbyz.