Astanada LRT vagony oqýshylardyń patrıottyq ánimen terbeldi
ASTANA. KAZINFORM — Astanalyq oqýshylar Respýblıka kúnine oraı Tarlan Astana-da erekshe fleshmob uıymdastyrdy, dep habarlaıdy elorda ákimdiginiń resmı saıty.
Astanadaǵy № 104 jalpy orta mekteptiń oqýshylary Respýblıka kúni qarsańynda «Tarlan Astana» jeńil relsti kóliginde «Kók týdyń jelbiregeni» patrıottyq ánin oryndady.
Merekege oraı uıymdastyrylǵan bastama óskeleń urpaqtyń boıynda elge degen patrıottyq sezimdi kúsheıtýge, el táýelsizdigi men memlekettik rámizderge degen qurmetti arttyrýǵa baǵyttalǵan.
Mektep dırektory Nurtas Qurmanǵalıulynyń aıtýynsha, bul bastamanyń basty maqsaty — oqýshylarǵa Respýblıka kúniniń mánin túsindirip, olardyń týǵan eline degen maqtanyshyn nyǵaıtý.
— Respýblıka kúni — eldigimizdi aıshyqtap, egemendigimizdi ulyqtaıtyn erekshe mereke. Osy aıtýly kúnge oraı oqýshylarǵa «Kók týdyń jelbiregeni» ánin oryndatyp, olardyń júregine Otanǵa degen súıispenshilik pen týǵan jerge degen maqtanysh sezimin uıalatýdy maqsat ettik. Óıtkeni táýelsiz eldiń óskeleń urpaǵyn otansúıgishtikke baýlyp, memlekettik rámizderdi qurmetteýge, ulttyq qundylyqtardy qadirleýge tárbıeleý — bizdiń basty mindetimiz, — dedi mektep dırektory.
Budan buryn Respýblıka kúni qarsańynda «Kitap oqıtyn ult» jobasynyń ánurany tanystyrylǵanyn jazǵanbyz.
