Astanada LRT synaq rejıminde paıdalanyla bastaldy
ASTANA. KAZINFORM - 29 qyrkúıekten bastap Astanada jeńil relsti kólik júıesi synaqtyq paıdalanýy bastaldy. Bul – ınfraqurylymnyń tehnıkalyq daıyndyǵyn, qozǵalys qaýipsizdigin jáne jolaýshylar úshin qolaılylyǵyn tekserýge múmkindik beretin mańyzdy kezeń.
Elordadaǵy LRT júrgizýshisiz qozǵalady. Synaq barysynda mamandar relsterdi, stantsııalardy, baılanys jelilerin, jyljymaly quramdy, qaýipsizdik pen qozǵalysty basqarý júıelerin tekseredi. Erekshe nazar qyzmetkerlerdi daıyndaýǵa, tótenshe jaǵdaılardaǵy is-qımyldarǵa jáne LRT basqa kólik túrlerimen ıntegratsııalaýǵa aýdarylady.
LRT quramdary GoA4 apparattyq-baǵdarlamalyq keshenimen jabdyqtalǵan – bul tolyq avtomattandyrylǵan basqarý júıesi: qozǵalys, araqashyqtyqty saqtaý, toqtaý, esikterdi ashý jáne jabý, depodan shyǵý jáne kirý, jýý jumystary operatordyń qatysýynsyz júzege asyrylady.
«GoA4 – relsti kólikti avtomattandyrýdyń eń joǵary deńgeıi, jańa jelilerdi salý nemese qoldanystaǵy jelilerdi jańǵyrtý kezinde kóptegen qalalar umtylatyn standart. Metro men LRT júıeleri úshin bul tıimdilikti, qaýipsizdikti jáne basqa kólik túrlerimen salystyrǵanda básekege qabilettilikti arttyrýdy bildiredi. Búginde GoA4 Sıngapýrde, Dýbaıda jáne Qytaıda engizilgen, dál osyndaı zamanaýı deńgeı Astanada da iske asyrylady», – dep atap ótti «City Transportation Systems» JShS Basqarma tóraǵasy Asylbek Dúısebaev.
Jabdyq pen ınfraqurylymdy keshendi synaý keminde alty aıǵa sozylady. Birinshi kezeńde testileý №112–№113 stantsııalary arasynda bastalady. Poıyzdar bastapqyda 10 km/saǵ jyldamdyqpen qozǵalyp, keıin jyldamdyq pen synaq aımaqtary kezeń-kezeńimen artady. Bul eń joǵary qaýipsizdikti qamtamasyz etýge, relsterdi muqııat tekserýge jáne birtindep jobalyq parametrlerine ótý úshin qajet.
Birinshi kezeń:
saqınaly kabeldik jelini synaqtan ótkizý;
ınfraqurylym men jyljymaly quramnyń kólemin baqylaý;
relsterge kerneý berý;
poıyzdardy «sýyq» jáne «ystyq» júrgizý, ınjenerlik jeliler daıyn bolǵanyna qaraı synaq aımaqtaryn birtindep keńeıtý – aralyqtardan stantsııalarǵa deıin.
Ekinshi kezeń:
jyljymaly quramdy basqarýdyń negizgi júıelerin synaqtan ótkizý, radıobaılanysty tekserýdi qosa alǵanda;
qozǵalys qaýipsizdigin synaý;
poıyzdardyń platformalyq esiktermen ózara árekettesýin pysyqtaý;
stantsııalarǵa avtomatty túrde kelý jáne júrýdi tekserý;
sıgnalızatsııamen biriktirilgen symsyz júıelerdi synaý;
elektrmen jabdyqtaý júıesine túsetin júktemeni baǵalaý;
shtattyq jáne shtattan tys jaǵdaılardy modeldeý;
túrli paıdalaný stsenarıılerin ımıtatsııalaý.
-LRT poıyzyn júrgizýge daıyndalyp júrmiz. Oqytýdy Astanada teorııadan bastap, Qytaıda tájirıbelik mashyqtardy shyńdadyq. Sonyń ishinde elektrli poıyzdy basqarý, shtattan tys jaǵdaılarda áreket etý sııaqty mańyzdy daǵdylardy meńgerdik. 7 aılyq oqýdan ótip, mine, endi úshinshi kezeńin bastadyq. Ol test jumystaryna belsendi aralasý. Bul kezeńde LRT-ny tejeý, tartý júıeleri, avtomatty júrgizý jumysyna qatysamyz. Osy bilim men tájirıbe keıin jolaýshylardyń qaýipsizdigi úshin asa qajet bolady. Qazaqstandaǵy sý jańa kólik túrin alǵashqylardyń biri bolyp tizgindeý – úlken jaýapkershilik ári mártebe. LRT – zamanaýı qadam, sondyqtan biz óz úlesimizdi qosyp jatqanymyzǵa qýanyshtymyz, – dedi «City Transportation Systems» JShS-niń LRT poıyzdarynyń operatory Aıdar Nadyrbekov.
Qaýipsizdik maqsatynda estakadaǵa jáne jol jelisine kirýge qatań tyıym salynady, sebebi baılanys jelisi 750V joǵary kerneýmen jabdyqtalǵan jáne ol adam ómirine qaýipti.
Synaqtar aıaqtalǵan soń, 2026 jyly LRT júıesi paıdalanýǵa berilip, elordaǵa jańa býynnyń tolyq avtomattandyrylǵan jáne júrgizýshisiz basqarylatyn kóligi usynylady.
Astana ákimi LRT poıyzdaryn iske qosý ýaqyty men jol aqysyn málim etti.