Astanada LRT deposynyń qurylysy bastaldy

ASTANA. KAZINFORM – Elordada LRT jobasynyń negizgi ınfraqurylymdyq nysany – deponyń qurylysy bastaldy. Bul týraly CTS kompanııasynyń baspasóz qyzmeti habarlaıdy. 

Depo halyqaralyq áýejaı mańaıyndaǵy 16,84 ga aýmaq jerde ornalasady jáne LRT júıesine tehnıkalyq qyzmet kórsetý jáne basqarý ortalyǵyna aınalady.

«Depo ǵımarattarynyń jalpy aýdany shamamen 80 myń m² quraıdy. Onda jyljymaly quramǵa tolyqqandy tehnıkalyq qyzmet kórsetý jáne jóndeý úshin qajetti barlyq nysan ornalastyrylady. Keshen vagondardy jýý ǵımaratynan, qosalqy bólshekter men jabdyqtar qoımalarynan, joldardy jóndeýge arnalǵan arnaıy tehnıka, sondaı-aq qyzmetkerlerdi oqytý jáne biliktiligin arttyrýǵa arnalǵan ákimshilik ǵımarattardan turady», - delingen habarlamada. 

Depo aýmaǵynda pılotsyz poıyzdardy basqarý ortalyǵy da qurylady. Avtomattandyrylǵan basqarý júıesi qaýipsizdik pen tıimdilikti edáýir arttyrýǵa múmkindik beredi. Sondaı-aq depony iske qosý, tejeý jáne stantsııalarda toqtaý sııaqty protsesterdi avtomattandyryp, adamı faktordy barynsha azaıtady.

«Estakada boıynsha negizgi qurylys jumystarynyń aıaqtalýyna baılanysty, qysqy kezeńde qurylys tehnologııasyna sáıkes, LRT jobasynyń jumystary depo qurylysyna shoǵyrlanady», - dep tolyqtyrdy mekemeden. 

Buǵan deıin LRT poıyzy operatorlaryn oqytýǵa aldyn ala qabyldaý bastalatyny týraly habarlaǵan edik.