Astanada lombardqa shabýyl jasaǵan adamǵa qatysty «Kepilge alý» babymen sotaldy tergeý bastaldy

ASTANA. QazAqparat - Astanada M-Lombardqa tonamaq bolyp shabýyl jasaǵan adamǵa qatysty eki bap boıynsha sot aldyndaǵy tergeý bastaldy. «Qaraqshylyq» babyna «Kepilge alý» baby qosyldy. «Búgingi oqıǵa boıynsha QR Qylmystyq kodeksiniń eki baby boıynsha: «Qaraqshylyq» - 192-bap jáne «Kepilge alý» - 261-bap sotaldy tergeý bastaldy», dep habarlady «QazAqparat» HAA tilshisine Astana ІІD baspasóz qyzmetiniń jetekshisi Sofıa Qylyshbekova.

«Lombardqa qaraqshylyq jasamaq bolǵan adam ǵımarattan shyǵaryldy. Qazirgi kezde tıisti sharalardyń aıasynda ony tergeý amaldary júrip jatyr», - dedi S. Qylyshbekova.

Atalǵan lombardtyń eki qyzmetkeri aman-esen bosatyldy. Atap aıtqanda, 2,5 saǵat kelissózder júrgizildi, kúdikti polıtsııaǵa qarsylyq kórsetken joq. Jalpy eshkim de zardap shekpedi.

Onyń sózine qaraǵanda, lombardqa múliktik zaqym kelgen joq. Kúdiktimen aradaǵy kelissózder telefon arqyly júrgizilgen kórinedi.

Eske sala keteıik, búgin Kenesary kóshesinde «Spýtnık»  dúkeni aýdanynda ornalasqan «M-Lombardty» tonaýǵa áreket jasaldy. Іshke basyp kirý kezinde dabyl tetigi iske qosylyp, esik avtomatty túrde qulyptalyp, ishte kúdikti jáne eki lombard qyzmetkeri qamalyp qaldy. Atalǵan lombardta kúzetshi bolmaǵan, ıaǵnı ǵımarattyń dabyl belgisi qashyqtan kúzet fırmasyna qosylǵan eken.

Jedel is-sharalarǵa qalanyń barlyq shuǵyl qyzmetteri tartyldy. Shara ishki ister mınıstriniń birinshi orynbasary Marat Demeýovtiń basshylyǵymen júrgizildi. Qaraqshy arnaıy qyzmetter jaýyngerleri ǵımarattyń ishine kirgennen keıin ustaldy. 

Naqtylanǵan málimetter  boıynsha, kúdikti 1974 jylǵy Astana turǵyny. Operatsııa júrgizý barysynda ustalǵan adamnan pnevmatıkalyq qarý tárkilenip, ballıstıkalyq saraptamaǵa jiberildi.