Astanada lombardqa shabýyl jasady dep jalǵan habar bergen áıel ustaldy
ASTANA. QazAqparat - Almaty aýdany ІІB qylmystyq polıtsııa bóliminiń qyzmetkerleri lombard bólimshesine qaraqshylyq shabýyly jasaldy dep jalǵan habar bergen kúdikti ustaldy, dep habarlaıdy «QazAqparat» HAA Astana ІІD baspasóz qyzmetine silteme jasap.
«Polıtsııaǵa Qajymuqan kóshesindegi lombard ǵımaratyna belgisiz adam qaraqshylyq shabýylyn uıymdastyrǵany, pyshaqqa uqsas zatpen qorqytyp kúsh qoldaný arqyly seıften aqsha alyp ketkeni týraly habar kelip tústi», - delingen habarlamada.
Tergep-tekserý jáne jedel izdestirý sharalary kezinde lombard qyzmetkeri (sarapshy-baǵalaýshy) shabýyldy oıdan shyǵarǵan bolyp shyqty. Áıel óz aıybyn moıyndady.
Osy fakti Sotqa deıingi tergep-tekserýdiń biryńǵaı tizilimine QR Qylmystyq kodeksiniń 189-shi («Senip tapsyrylǵan bóten múlikti ıemdenip alý nemese talan-tarajǵa salý») jáne 419-babymen («Kórineý jalǵan sóz jetkizý») tirkeldi.
