Astanada lombardqa qaraqshylyq shabýyl jasaǵan Ózbekstan azamaty ustaldy

Bul týraly búgin osy oqıǵaǵa qatysty arnaıy baspasóz máslıhatyn uıymdastyrǵan Astana qalalyq Іshki ister departamentiniń baspasóz hatshysy Nurdildá Oraz málim etti.

Onyń aıtýynsha, 5 jeltoqsan kúni keshki saǵat 17-00 shamasynda qalalyq Іshki ister departamentiniń Jedel basqarý ortalyǵyna altyn buıymdardy ıelený maqsatynda qaladaǵy lombardtardyń birine shabýyl jasalǵandyǵy jóninde habar kelip túsken. Málimet kelip túsisimen oqıǵa ornyna «Saryarqa» aýdandyq ishki ister basqarmasynyń jedel toby shyqqan.

Tekserý barysynda málim bolǵanyndaı, 5 jeltoqsan kúni shabýyl jasalǵan lombarda 1966 jyly týǵan K. esimdi azamatsha otyrǵan. Keshki saǵat 17-00 shamasynda lombardqa 25 jas shamasyndaǵy eki azamat keledi. Olardyń bireýi ishke kirip, ekinshisi syrtta qalady. «Іshke kirgen azamat satýshydan "altyn alasyz ba?" dep suraıdy. Budan soń ol qaltasynan travmatıkalyq tapanshasyn shyǵaryp, qyzmet kórsetiletin terezeden satýshynyń keýdesiniń oń jaǵynan atady. Osy ýaqytta satýshy ishki bólmege qashyp kiredi. Birshama ýaqyttan soń satýshy qaıtyp kelip, ústel astynda ornalasqan dabyl belgisin basyp, ishki bólmege qaıtyp kirip ketken. Lombardtyń ishki kiretin esigi temir bolǵandyqtan, qaraqshylar oǵan kire almaǵan. Alaıda qaraqshylardyń biri altyn buıymdar turǵan áınekti syndyryp, olardan birneshe altyn zat alyp úlgeredi, qalǵan altyndar edenge shashylyp qalǵan. Budan soń qaraqshylar lombardan qashyp ketedi. Al satýshy aýrýhanaǵa jetkizildi»,-dedi baspasóz hatshysy.

Osy oqıǵadan soń ishki ister departamentiniń jeke quramy izdeýge túgel jumyldyrylady. Oqıǵaǵa kúdikti azamattardy anyqtaý úshin aımaqtaǵy barlyq dúkender men lombardtar tekseriledi. «Jedel-izdestirý jumystarynyń barysynda 14 qańtar kúni 1987 jyly týylǵan, buryn sottalǵan Ózbekstan azamaty ustaldy. Ol Astanada ýaqytsha turyp jatqan. Tergeý jumystarynyń barysynda ol qylmysyn moıyndaǵan. Sonymen qatar onyń eki sybaılasynyń aty-jónderi anyqtalyp, qazir olar izdestirilýde», -dedi departament ókili.