Astanada LiveGood kompanııasynyń múlki men shottary tárkilendi

ASTANA. KAZINFORM –  Astanada «LIVEGOOD» qarjylyq pıramıdasyn uıymdastyrýdan alynǵan qylmystyq tabysty jylystatý shemasy anyqtaldy.

 Tergeý barysynda 2023 jyldan 2025 jylǵa deıingi aralyqta kúdikti bıologııalyq belsendi qospalardy satýmen aınalysatyn jelilik marketıngtiń atyn jamylǵan «LIVEGOOD» qarjylyq pıramıdasynyń qurylymdyq bólimshesin basqarǵany anyqtaldy.

Pıramıda shemasy bınarly júıege negizdelgen, oǵan sáıkes qatysýshylar jańa qatysýshylardy shaqyrý sanyna baılanysty ártúrli deńgeılerde ornalastyrylǵan. 

Osylaısha, qarjylyq pıramıdanyń negizgi tabysyn BBQ satý emes, jańa salymshylardyń jarnalary quraǵan.

Ýádege sengen 6 myńnan astam azamat deńgeıine baılanysty aıyna 2 000 AQSh dollaryna deıin bonýs alýǵa úmit artyp, «LIVEGOOD» kompanııasynan aı saıynǵy tólemi bar 50 AQSh dollaryna jazylym satyp alǵan.

Zańsyz jolmen alynǵan qarajatqa kúdikti quny 60 mıllıon teńgeden astam avtoturaǵy bar eki páter satyp alǵan, olardy zańdy jolmen tapqan tabysymen úılestirip tárkileýden jasyrý maqsatynda óz atyna jáne senimdi tulǵalarǵa rásimdegen. Sonymen qatar, tergeý barysynda «Binance» bırjasynda 0,28 BTC krıptoaktıvteri bar ekeni anyqtaldy, bul 28 myń AQSh dollaryna teń.

Sottyń sanktsııasymen jyljymaıtyn múlik pen krıptoaktıvterge, avtokólikke, sondaı-aq tintý kezinde tárkilengen 19 mıllıon teńge jáne 4 myń AQSh dollaryna tyıym salyndy.

2025 jyldyń 7 aqpanynda kúdikti Astana qalasyndaǵy áýejaıda shekarany kesip ótý jáne Túrkııaǵa ushýǵa qamdaný kezinde ustalyp, ýaqytsha ustaý ızolıatoryna qamaýǵa alyndy. 2025 jylǵy 8 aqpanda sot oǵan eki aıǵa «kúzetpen ustaý» túrindegi bultartpaý sharasyn sanktsııalady. Sotqa deıingi tergeý jalǵasyp jatyr.

QІJK 201-baby boıynsha tergeýdiń múddesine baılanysty basqa aqparat taratylmaıdy.

Eske salsaq, elde 42 qarjy pıramıdasy joıylǵan edi.