Astanada Leıla Mahattyń «Asa aýyr jeńildik» atty sýret kórmesi ashyldy

Kórmege belgili sýretshiniń «Kóne oıý-órnekter», «Qulandar rýhy», «Dala aspany», «Ańdar», «Jańa qala», «Ýaıym» syndy týyndylar serııalarynan alynǵan 57 shyǵarmasy qoıylǵan.

Kórme taqyryby negizinen búgingi kúngi jańa zamanaýı dástúrlermen ushtasqan kóshpeli saq órkenıetiniń tarıhı erekshelikterin arqaý etedi. Óner týyndylarynan ótken men búginniń baılanysyn beıneleıtin ári adam boıyndaǵy qaıshylyqtardy názik túrde jetkizetin jan tebirenisiniń, júrek tolqynysy men sana tolǵanysynyń órnekteri aıqyn ańǵarylady. Saq dáýirinen mura bolyp qalǵan ańdyq stıl órnekteri 20-30 ese úlǵaıtylyp, sýretshiniń gravıýralyq shyǵarmalarynda beınelengen. Týyndylar tıbet qaǵazyna qolmen túsirilgen.

«Búgingi kórmeniń «Asa aýyr jeńildik» dep atalýy múldem úılespeıtindeı áser qaldyrýy múmkin, biraq bul tegin emes. Bul cheh jazýshysy Mılan Kýnderanyń romanynan alynyp otyr. Adam bolmysyndaǵy qaıshylyq, kóne mádenıet pen qazirgi zamanaýı órkenıettiń sabaqtastyǵy, burynǵy saq bolmysynyń qaıtalanbas erekshelikteri syndy taqyryptar meni erekshe tolqytady, sondyqtan da kóne tarıhı mura men búgingi zamanaýı damý erekshelikteri meniń jumystarymnan kórinis taýyp otyr», - dedi sýretshi.