Astanada leıkozǵa shaldyqqan 30 bala S gepatıtin donor qanynan juqtyrǵan joq - zertteý nátıjesi
ASTANA. 16 qańtar. QazAqparat - Astanada leıkozǵa shaldyqqan 30 bala S gepatıtin donor qanynan juqtyrǵan joq. Arhıvtik qan úlgelerin qaıta teksergen shetel zerthanalary osyndaı qorytyndy jasady. Bul jóninde búgin Transfýzıologııa ǵylymı-óndiristik ortalyǵy dırektorynyń birinshi orynbasary Sánııa Ábdirahmanova málim etti.
«Atalmysh oqıǵa boıynsha bizdiń ortalyqqa qaıta tekseris jasaldy. Tekseris barysynda S gepatıtin juqtyrǵan balalarǵa qoldanylǵan qannyń 1600-den astam arhıvtik úlgileri kóterildi. Biz qoldanylǵan qannyń úlgilerin úsh jylǵa deıin arhıvte saqtap otyramyz. Sol úlgiler zertteldi. Sonyń ishinde 401 úlgi shetel zerthanalaryna jiberildi. Olar - Ulybrıtanııanyń ulttyq transfýzıologııalyq zerthanasy men Shveıtsarııanyń Tsıýrıh qalasynda ornalasqan Qan ortalyǵy. Ondaǵy zertteý nátıjesi vırýstyń joq ekendigin kórsetti. Sondyqtan balalarǵa S gepatıti donor qany arqyly juǵýy múmkin emes», - dep atap ótti ol. 2013 jyldyń birinshi jartysynda Ana men bala ortalyǵynda leıkoz syrqatynan emdelip jatqan 270 balanyń 30-y S vırýs gepatıtin juqtyrǵan bolatyn. Atalǵan fakti boıynsha qan úlgileri otandyq zerthanalarda tekserilgen bolatyn. Ol kezde de donor qanynan eshbir vırýs tabylmaǵan.
