Elordaǵa Italııa murajaılarynan Leonardo da Vınchıdiń 40-tan astam eksponaty ákelindi
ASTANA. KAZINFORM — Elordada XV ǵasyrda ómir súrgen uly sýretshi, ónertapqysh ári ınjener Leonardo da Vınchıdiń shyǵarmashylyǵyna arnalǵan aýqymdy kórme ashyldy. Rım men Florentsııa murajaılarynan arnaıy ákelingen 40-tan astam tolyq ólshemdi mehanızmder modelderi, zamanaýı mýltımedııalyq tehnologııalar jáne álemge áıgili kartınalardyń reprodýktsııasy Astana tórine qoıyldy.
Mádenıet oshaǵynyń basshylyǵy bul sharanyń ulttar arasyndaǵy toleranttylyq pen mádenı almasýdyń altyn kópiri ekenin atap ótti.
— Búgingi tańda bizdiń Beıbitshilik jáne kelisim saraıymyzda XV ǵasyrda ómir súrgen uly sýretshi, ónertapqysh, ınjener Leonardo da Vınchıdiń shyǵarmashylyǵyna qatysty keremet kórme ashyldy. Mundaı kórmeler adamzattyń ortaq mádenıetin tereńirek tanýǵa kómektesedi dep esepteımin. Sebebi Leonardo da Vınchı búkil adamzatqa tıesili tulǵa, onyń XV ǵasyrda oıyna kelgen ıdeıalary búgingi kúni de ózekti. Óz mádenıetimen qatar ózge halyqtardyń da murasyn biletin adam árqashan tolerantty, ashyq bolady. Al bizdiń jerimizdegi beıbitshilik dál osy toleranttylyqqa negizdeledi, — deıdi Beıbitshilik jáne kelisim saraıynyń dırektory Narıma Muhambetalına.
Sonymen qatar kórme zalynyń qurylymy da erekshe oılastyrylǵan. Kólemi 3 myń sharshy metrge jýyq aýmaqty alyp jatqan ekspozıtsııa keńistigi tabıǵattyń tórt elementine — Aýa, Sý, Jer jáne Ot zalyna bólingen. Kórme gıdiniń aıtýynsha, eksponattardyń ishinde adam balasynyń qııalyn terbeıtin dúnıeler óte kóp.
— Meniń oıymsha, eń qyzyqty eksponattardyń biri — Aýa zalynda. Sebebi Leonardo da Vınchıdiń eń úlken armandarynyń biri adamnyń aspanǵa ushýy edi. Ol kezde adamzat muny oılaýǵa batpaǵannyń ózinde, Da Vınchı armandap, mehanızmder men tik orıntoptorlardy, qazirgi áýe sharlaryna uqsas apparattardy oılap tapqan. Sondaı-aq Ot zalyndaǵy soǵys mashınalary da óte qyzyq. Kóbi ony tek sýretshi dep biledi, biraq ol ómiriniń kóp bóligin ınjener retinde ótkizgen. Sondyqtan katapýlta, bombarda, bý zeńbiregin, tipti qazirgi tank pen zeńbirektiń alǵashqy úlgilerin jasap shyǵarǵan, — deıdi kórme gıdi Aıfara Qabyldına.
Injenerlik týyndylardan bólek, kórmede Da Vınchıdiń álemge áıgili beıneleý óneri týyndylaryna da arnaıy oryn berilgen.
«Mona Lıza» men «Taınaıa vecherıa» sekildi kartınalardyń reprodýktsııalary zamanaýı tehnologııalarmen jasalǵan.
LED-týnnelder, tsıfrlyq proektsııalar men golografııalyq ınstallıatsııalar arqyly kelýshiler renessans dáýiri men bolashaq tehnologııalardyń sıntezin tamashalaı alady.
Aıta ketelik elimizde 286 mýzeı jumys isteıdi. Olardyń qorynda 4,5 mıllıonnan astam jádiger saqtalǵan, al mýzeılerge jyl saıyn 6,5 mıllıonnan astam adam keledi.
