Astanada «Lazýrnyı kvartal» turǵyn úı kesheninde órt shyqty
ASTANA. QazAqparat - Astanada Saraıshyq 5G mekenjaıy boıynsha ornalasqan kópqabatty turǵyn úıdiń balkony órtendi, dep habarlaıdy QazAqparat.
Qalalyq Tótenshe jaǵdaılar departamentiniń bergen málimetterine sáıkes, úıden órt shyqqany týraly aqparat saǵat 13:17 shamasynda túsken. 
«Tórt mınýtta jetken órt sóndirýshiler 1 men 2 qabat aralyǵynda 40 sharshy metr aýmaqta jylytý materıaldary órtke oranǵandyǵyn anyqtady. Órt sóndirý bólimsheleriniń jedel ári uıymdasqan jumysynyń arqasynda órt saǵat 13:41-de sóndirildi», - dep atap ótti departamenttiń baspasóz qyzmeti.
Aıta ketý kerek, tilsiz jaýmen kúreske jeke quramnyń 24 qyzmetkeri men 5 tehnıka tartyldy.
Japa shekkender men jaraqattanǵandar joq.
