Astanada Latıf Qazbekovtiń «Ertegiler álemine saıahat» kórmesi ashylady
ASTANA. QazAqparat - 28 qazanda Qazaqstan Respýblıkasy Tuńǵysh Prezıdenti Mýzeıinde Reseı Sýretshiler odaǵynyń múshesi Latıf Qazbekovtiń «Ertegiler álemine saıahat» atty sýret kórmesiniń saltanatty ashylýy ótedi. Bul týraly atalǵan memlekettik mekemeniń baspasóz qyzmeti habarlady.
Kórmeni Mýzeıdiń «Mádenıet arqyly únqatysý» halyqaralyq jobasynyń aıasynda, «Peterbordyń erkin sýretshileri» jobasynyń ókildigi men Reseı Federatsııasynyń Qazaqstandaǵy elshiligi birlesip uıymdastyrady.
Latıf Qojahmetuly Qazbekov 1954 jyly Qazaqstanda (Almaty oblysynyń Aqsý aýyly) dúnıege kelgen. N.V. Gogol atyndaǵy Almaty kórkemsýret ýchılışesin jáne Lenıngrad qalasyndaǵy Reseı kórkemsýret Akademııasyn (qazirgi ýaqytta I.E. Repın atyndaǵy Sankt-Peterbýrg memlekettik akademııalyq keskindeme, músin jáne sáýlet ınstıtýty) támamdaǵan. Latıf Kazbekov lıtografııa, beıneleý, ofort jáne kitap grafıkasy tehnıkalarynda oryndalǵan týyndylardyń avtory. Qazirgi ýaqytta Sankt-Peterbýrg memlekettik ýnıversıtetinde kıno óneri kafedrasynyń anımatsııa jáne mýltıplıkatsııa bóliminde oqytýshylyq qyzmet atqarady. Reseı, AQSh, Germanııa, Frantsııa, Ulybrıtanııa, Japonııa, Fınlıandııa, Italııa, Danııa, Nıderlandy, Belgııa, Polsha, Kýba, Meksıka, Kanada, Chehııa, Ońtústik Koreıa, Grekııa, Shveıtsarııa, Baltyq jáne TMD memleketterinde uıymdastyrylǵan 22 jeke kórmeniń jáne 300-den astam kórmelerdiń avtory bolyp tabylady.
Kóptegen halyqaralyq jáne otandyq beıneleý óneri jáne kitap óneri konkýrstarynyń laýreaty.
«Ertegiler álemine saıahat» - L. Kazbekovtiń Qazaqstandaǵy alǵashqy jeke kórmesi. Kórme qonaqtary avtordyń álem halyqtarynyń 15 ertegisiniń sýrettemelerimen tanysý múmkindigine ıe bolady. Atap aıtqanda, ol Italııa, Kenııa, Amerıka, Japonııa, Reseı ertegileri, ejelgi Grekııa ańyzdary, astarly áńgimeler men óleńderge arnalǵan sýrettemeler qoıylatyn bolady. Olardyń ishindegi eń ataqtylary D.Ch. Harrıstiń «Rımýs aǵaıdyń ertegileri» toptamasyndaǵy qoıannyń beınesi jáne «Altyn kilt nemese Býratınonyń bastan keshken oqıǵalary» ertegisindegi Býratıno beınesi. Jalpy kórmede avtordyń 98 týyndysy kórermen nazaryna usynylatyn bolady.
