Astanada qyzylshaǵa qarsy qosymsha ekpe kimderge jasalady
NUR-SULTAN. QazAqparat - Elordanyń Qoǵamdyq densaýlyq saqtaý departamentiniń basshysy Sádýaqas Baıǵabylov qyzylshaǵa qarsy qosymsha vaktsınatsııalaý jumystary qalaı júrgiziletinin túsindirdi, dep habarlaıdy QazAqparat tilshisi.
Osyǵan deıin habarlanǵandaı, 1 sáýir kúni Nur-Sultan qalasynda ózge óńirlermen birge qyzylshaǵa qarsy egýdiń qosymsha sharalary bastalǵan bolatyn.
«Osy jyldyń sáýir aıynda 9-10 aılyq 3 856 bala, ekpeniń josparly kúntizbesi boıynsha 1-6 jas aralyǵyndaǵy 3 441 bala, sonymen birge 40 jasqa deıingi medıtsınalyq qyzmetkerlerge ekpe jasalýy kerek. Jalpy, 2019 jyldyń sońyna deıin qosymsha vaktsınatsııamen 9-10 aılyq 19 284 bala, ekpeniń josparly kúntizbesi boıynsha 1-6 jas aralyǵyndaǵy 30 949 bala qamtylady. Osy maqsatta qarajat respýblıkalyq bıýdjetten bólindi», - dedi Sádýaqas Baıǵabylov.
Onyń aıtýyna qaraǵanda, 9-10 aılyq balalar úshin 26 medıtsınalyq uıymda jeke kabınetter qarastyrylatyn bolady. 12 aılyq jáne 6 jasqa deıingi balalardy josparly vaktsınatsııalaý kádimgi ekpe kabıentterinde júrgiziledi.
«40 jasqa deıingi medıtsınalyq personaldy statsıonarlarda qurylǵan 21 ekpe brıgadasy vaktsınatsııalaıdy. Ár quramda bir dáriger men eki medbıke bar. Qazirgi ýaqytta qoımada 22 myń doza bar. Oǵan qosymsha taǵy 45 myń doza qosylady. Medıtsınalyq qyzmetkerler balalarǵa ekpe jasaý úshin ata-analarǵa aldyn ala habar beredi. Qolǵa alynǵan sharalar jańa epıdemıologııalyq kezeńde qyzylshaǵa shaldyǵý deńgeıin tómendetip, ýshyǵý jaǵdaıyn báseńdetedi, kúrdeli jaǵdaılardyń aldyn alady», - deıdi departament basshysy.
Qyzylshaǵa qarsy egý suraqtary boıynsha 87780127000 nómirine habarlasýǵa bolady.
Eske sala ketsek, kesheden beri respýblıka boıynsha qyzylshaǵa qarsy vaktsınatsııa júrgizile bastaǵan edi. Bıyl alǵash ret bir jasqa tolmaǵan balalarǵa ekpe salý bastaldy. Sebebi 12 aıǵa tolmaǵan balalardyń arasynda qyzylsha aýrýyna shaldyǵý kórsetkishi joǵary bolyp tur.
QR Bas memlekettik sanıtarlyq dárigeri Jandarbek Bekshınniń aıtýynsha, qyzylsha barlyq aımaqtarda tirkelip otyr. Alaıda Nur-Sultan, Almaty, Shymkent qalalarynda, sondaı-aq Aqmola men Túrkistan oblystarynda aýrý órship tur. Máselen, naýryzdyń basynda Astanada on adam jansaqtaý bólimine tústi. Al elordanyń ınfektsııalyq aýrýhanasynda qosymsha kereýitterdi qoıýǵa týra kelgen.
