Astanada Qyzylorda oblysynyń mádenıet kúnderi aıasynda Batyrhan Shókenov án shyrqaıdy
ASTANA. QazAqparat - 26-29 maýsym kúnderi Astana qalasynda Qyzylorda oblysynyń mádenıe kúnderi ótedi. Bul týraly oblystyq ákimdiktiń saıtynda habarlandy.
Arqa tórindegi bas qala turǵyndary Syr ónerpazdarynyń shyǵarmashylyǵyn tamashalaıdy. Kúmbirlegen qobyz, dombyranyń qońyr úni, jyrshy, ánshi, myń buralǵan bıshiler, teatr ártisteriniń qoıylymdary elordalyqtarǵa rýhanı kesh syılamaq. Óner kúnderiniń shymyldyǵy N.Bekejanov atyndaǵy qazaq mýzykalyq drama teatry ujymy sahnalaıtyn J.Erǵalıevtiń «Qulpytastyń kóz jasy» dramasymen túriledi.
27 maýsym kúni «Kongress-Holl» saraıynda «Syr óńiri - túrki órkenıetiniń altyn besigi» atty kórme uıymdastyrylmaq. Astanalyqtar munda Qyzylorda oblysy aýmaǵynda bolǵan eski qalalarmen tanysyp, qolóner sheberleriniń týyndylaryn tamashalaıdy.
Osy kúni «Syr - Alashtyń anasy» atty kontsert bolady. Keshte dástúrli jyraýlyq ónerdi nasıhattaýshy QR eńbek sińirgen qaıratker Almas Almatov, Elmıra Jańabergenova, jas jyrshylar, halyqaralyq balalar shyǵarmashylyǵy konkýrstarynyń laýreattary, «Tomırıs» bı ansambli, tanymal estrada juldyzdary Batyrhan Shókenov, Gúlnur Orazymbetova, Ómirqul Aınııazov, Elena Ábdihalyqova óner kórsetedi.
28 maýsym kúni oqýshylar saraıynda Iran-Ǵaıyptyń «Qorqyt» dramasy sahnalanady. Sońǵy kúni «Tilep Qobyz» saraıynda «Syr súleıin surasań...» jyrshy-oryndaýshylardyń dástúrli jyr keshi jáne oqýshylar saraıynda E.Tóleýbaıdyń «Abaı» tragedııasynyń qoıylymy ótedi. Mádenı shara «Kongress-Holl» saraıynda aqyn, ánshi-sazger Elena Ábdihalyqovanyń jáne oblys ónerpazdarynyń «Men Syrdarııamyn» atty keshimen qorytyndylanady.
