Astanada qyz ben jigit taksı júrgizýshilerin aldap soqqan
ASTANA. QazAqparat - Astana qalasy krımınaldyq polıtsııa qyzmetkerleri 23 jastaǵy jigit pen 21 jastaǵy boıjetkendi ustady. Olar azamattardyń sengishtigin paıdalanyp, alaıaqtyq jolmen júrgizýshilerdiń aqshasyn qaltaǵa basqan, dep habarlaıdy QazAqparat Astana PD baspasóz qyzmetine silteme jasap.
Kúdiktiler ınternet arqyly azyq-túlik nemese gúl jetkizip berý úshin taksı jaldap, júrgizýshilerden balans toltyrýyn nemese elektrondyq ámııandaryna aqsha jiberýin suraǵan. Júrgizýshiler aqshany qaıtaramyz degen ýádelerine senip, suraǵan somasyn aýdarǵan. Olar shaqyrylǵan jerge barǵanda ǵana aldanǵanyn túsingen.
Qazirgi ýaqytta QR QK 190-baby boıynsha («Alaıaqtyq») sotqa deıingi tergeý jumystary júrip jatyr. Jalpy zalal somasy anyqtalýda. Kúdiktiler Astana PD ýaqytsha ustaý oqshaýlaǵyshyna qamaldy.
Anyqtalǵandaı, ustalǵandar buryn da osyndaı qylmysy úshin jaýapqa tartylǵan. Qazirgi tańda polıtsııaǵa 10-nan astam aldanǵan turǵyn shaǵymdanǵan. Olardyń sany odan da kóp bolýy múmkin. Zardap shegýshiler myna mekenjaıǵa kelýine bolady: Beıbitshilik, 19. Nemese 8-(7172)-71-62-91, 71-63-35, 71-60-10, 8-777-722-88-55 telefon nómirlerine habarlasý kerek.
