Astanada Qytaı memlekettik damý bankiniń ókildigi ashyldy
ASTANA. QazAqparat - Elordada Qytaı memlekettik damý bankiniń ókildigi ashyldy, dep habarlaıdy QazAqparat tilshisi.
Qytaı memlekettik damý bankiniń ókildigi «Astana» halyqaralyq qarjy ortalyǵynda tirkelgen. Aıta ketsek, Prezıdent Nursultan Nazarbaevtyń bastamasymen jumysyn bastaǵan «Astana» HQO-nyń maqsaty - álemdik standarttarǵa saı keletin keshendi qarjylyq platforma qurý bolyp tabylady.
Atalǵan ókildiktiń ashylýy Qytaıdyń Qazaqstanmen seriktestigin nyǵaıta túskisi kelgendigin tanytyp otyr.
«Búgin Astanada Qytaı memlekettik damý bankiniń ókildigin ashý úshin bas qosyp otyrmyz. Keshe Astanaǵa kelgenimizde bizdiń áriptester Astanaǵa alǵashqy qardyń jaýǵanyn aıtty. Oǵan bárimiz kýá boldyq. Al búgin sol qar erip, kún shyǵyp tur. Qytaıda qardyń erýin jaqsy yrymǵa balaıdy. Mine, osy alǵashqy qar bizdiń ókildiktiń ashylýyna sáttilik ákeler degen senimdemiz. Bes jyl buryn Qytaı tóraǵasy Sı Tszınpınniń Qazaqstanǵa resmı sapary barysynda «Jibek joly» ekonomıkalyq beldeýin qurý týraly bastama aıtylǵan edi. Sodan bergi bes jyldyń ishinde «Bir beldeý, bir jol» bastamasy naqty áreketke aınalyp, halyqaralyq tıimdi seriktestiktiń úlgisine aınaldy. Aıta keterligi, Bir beldeý, bir jol» bastamasy Qazaqstannyń jańa ekonomıkalyq saıasaty - «Nurly jolmen» astasyp, ózara tıimdi seriktestigimizdi alǵa jetelep keledi», - deıdi Qytaı memlekettik damý bankiniń ókildiginiń vıtse-prezıdenti Lıý Tszın.
Óz kezeginde «Astana» halyqaralyq qarjy ortalyǵynyń basqarýshysy Qaırat Kelimbetov Qytaı memlekettik damý banki - álemdegi iri qarjylyq ınstıtýttardyń biri ekeni burynnan aıtylyp kele jatqanyn atap ótti.
«Bul bank - Qazaqstandaǵy ártúrli qarjylyq ınstıtýttarmen jáne iri konglamerattarmen jumys istep kele jatqan qarjy uıymy. Osy jıynǵa bizdiń elimizdiń iri qarjy ınstıtýttarynyń ókilderi qatysyp otyr. Bul aldymyzda uzaq ári ózara tıimdi qaýyrt jumystyń kútip turǵanyn dáleldeı túsedi. Astanada Qytaı memlekettik damý bankiniń ókildiginiń ashylýy - bizdiń memleketterimizdiń basshylary kelisken kelisimder jedel ári tıimdi túrde júzege asýyna serpin bolar degen senimdemin», - dedi Qaırat Kelimbetov.
Aıta keteıik, Qytaı memlekettik damý banki - álemdegi eń iri qarjylyq ınstıtýttardyń biri, sheteldik qarjylandyrý men ınvestıtsııalaý boıynsha operator.
