Astanada Qytaı ártisteri óner kórsetti
ASTANA.QazAqparat - Astanada Qytaı ulttyq opera, bı jáne drama teatrynyń kontserti ótti, dep habarlaıdy QazAqparat tilshisi.
Mýzykalyq keshti QR Mádenıet jáne sport mınıstrliginiń ókilderi, Qazaqstandaǵy Qytaı Halyq Respýblıkasynyń Tótenshe jəne Ókiletti Elshisi Chjan Hanhýeı, qala turǵyndary tamashalady.
Kontsert bastalar aldynda sóz alǵan QHR Elshisi qonaqtardy Qytaıdyń kóktem merekesimen (Qytaı jańa jyly - avt.) quttyqtap, osy sharany uıymdastyrýǵa muryndyq bolǵan QR Mádenıet jáne sport mınıstrligi men Astana qalasynyń ákimdigine alǵysyn bildirdi.
«Eki el basshylary Nursultan Nazarbaev pen Sı Tszınpınniń bastamasymen memleketaralyq qarym-qatynas nyǵaıa tústi. «Bir beldeý - bir jol» jobasy jáne mádenı saladaǵy yntymaqtastyq qazaq-qytaı strategııalyq áriptestiktiń damýyna oń serpin berdi, - dedi Chjan Hanhýeı.
Óz kezeginde, QR MSM Mádenıet jáne óner isteri departamenti dırektorynyń orynbasary Ábil Jolamanov mınıstrlik atynan arnaıy quttyqtaýdy oqyp berdi.
«Bul mereke álemniń kóptegen elderinde keńinen toılanady. Mundaı mádenı sharalar halyqtar arasyndaǵy ózara túsinistikti odan ári nyǵaıtpaq», - dedi Ábil Jolamanov.
Aıta keteıik, bul Qytaı ulttyq opera, bı jáne drama teatrynyń Qazaqstanǵa alǵashqy gostroldik sapary. Teatr Qytaıdaǵy kóp jyldyq tarıhy bar iri óner ordasy bolyp tabylady. Óner ujymy AQSh pen Eýropanyń kóptegen elderiniń joǵary baǵasyn alǵan. 
