Astanada qysqy syrǵanaý maýsymy bastaldy
ASTANA. QazAqparat - Búgin Astanada muz aıdyndar men qysqy syrǵanaý oryndary ashyldy, dep habarlaıdy «QazAqparat» HAA.
Astana ákimdiginiń baspasóz qyzmeti habarlaǵandaı, qaladaǵy barlyq ashyq muz aıdynyndarda konkı men shanany jalǵa berý baǵasy saǵatyna 500 teńge bolady. «Qysta, taza aýadaǵy demalysty qoljetimdi etý úshin konkıler men shanalardy jalǵa berý baǵasy da saǵatyna 500 teńge bolyp bekitildi. Muz aıdyndarynyń aýmaǵynda dámhana men medıtsınalyq pýnkt jumys isteıdi»,-dep habarlaıdy ákimdiktiń baspasóz qyzmeti. 
Al, «Aqbulaq» ózeniniń ústine salynǵan muz aıdynnyń ashylýynda «Almaty» aýdany ákiminiń apparaty, Astana qalalyq dene shynyqtyrý jáne sport basqarmasy men sporttyq sharalardy uıymdastyrý dırektsııasy dıskoteka men hokkeı jarysyn uıymdastyrdy.
Aıta keteıik, búgin Astanada «Araı» saıabaǵy mańynda da aýmaǵy 5 myń sharshy metrdi quraıtyn muz aıdyny ashyldy. «Esil» aýdany ákimdiginiń apparaty muz aıdyndy jaryq berip turatyn ıllıýmınatsııalyq qondyrǵymen jabdyqtaǵan jáne onda qalyń kópshiliktiń kóńil-kúıin ásem de sazdy áýen súıemeldep turady. 
«Saryarqa» aýdanyna qarasty taǵy tórt muzaıdyn aldaǵy kúnderi ashylady dep kútilýde. Atap aıtsaq, «Saryarqa» aýdanynyń ákimdigi qalalyq ákimdik aldyndaǵy alańda, Qosshyǵululy kóshesinde («Soltústik» saýda ortalyǵyna qarama-qarsy), «Kóktal» turǵyn úı alqabyndaǵy «Naz» teatrynyń aldynda, «Óndiris» turǵyn úı alqabyndaǵy 49 mektep aldynda muz aıdynyn ashýǵa daıyndalyp jatyr.
Hokkeı oınaımyn degen oqýshylar úshin «Astana» sport kesheniniń janynan jańa hokkeı korty ashylmaq.
