Astanada qysqa merzimdi kýrstarda birqatar tehnıkalyq mamandyqtar qazaq tilinde oqytylady
«Partııanyń Astana qalalyq fılıalymen júzege asyrylyp jatqan jobalar baǵytynyń úsh toby týraly aıtýǵa ruqsat etińizder. Barlyq jobalar partııany jańǵyrtýdyń bazalyq qaǵıdattaryna, «Rýhanı jańǵyrý» baǵdarlamasynyń básekege qabilettilik, pragmatızm, bilim kýlti baǵyttaryna súıenip, halyqtyń jalıy turmysyn, ómir sapasyn jaqsartýǵa baǵyttalǵan», - deıdi partııanyń Astana qalalyq fılıalynyń tóraǵasy.
Jobalardyń birinshi toby týraly aıtqan ákim jumyspen qamtýdyń jańa saıasaty salasyndaǵy qoljetimdi bilim berýge basa mańyz beriletinin sóz etti.
«Ózińiz tapsyrǵandaı, partııanyń eń basty mindetteriniń biri - halyqtyń tabysynyń ósimi. Búgingi tańda statıstıkaǵa sáıkes Astanada 500 myń adam jumyspen qamtylǵan. Onyń 300 myńy shaǵyn jáne orta bıznes salasynda. Bizdiń esepteýimizshe, 2023 jylǵa qaraı halyq sanynyń ósýine baılanysty Astanada jumys isteıtin adamdardyń sany 650 myńǵa jetedi. Demek, taǵy 150 myń jańa jumys ornyn ashý kerek. Partııalyq jobalar eń aldymen adamdardy jańa tehnologııalyq talaptarǵa saı etýdi kózdeıdi. Ol úshin biz «Bıg data» jobasy arqyly qalalyq tapsyrystan eskirgen mamandyqtardy alyp tastap, qalalyq sharýashylyq úshin qajetti mamandyqtardyń tizimin jasadyq. Olar lıftter boıynsha jumys atqaratyn ınjenerler, gazdandyrý salasyndaǵy mamandar, qazaq tili, aǵylshyn tili jáne geografııa pánderi boıynsha muǵalimder jáne búgingi tańda jetispeı otyrǵan ózge de mamandyqtar», - dedi ol.
Áset Isekeshevtiń aıtýynsha, sonymen qatar, joǵary tehnologııaly mamandyqtar - aqparattyq-modeldengen qurylys jáne jobalaý, kıberqaýipsizdik, kólik, medıtsına, bilim salasyndaǵy mamandyqtarǵa granttar bólinbek.
«Osyǵan baılanysty qalanyń memlekettik tapsyrysyn tolyǵymen qaıta qaradyq. Biz aldymen joǵary jáne orta bilimge tapsyrystardy ulǵaıtamyz. Ekinshiden, qysqa merzimdi kýrstar jasaqtalyp, ásirese ol kýrstar jumysshy jastar úshin ol yńǵaıly etý maqsatynda keshke jáne demalys kúnderi ótetindeı etip belgiledik. Bıyl baǵdarlamanyń bastalýy aıasynda 30 myń elorda turǵyny oqytylady. Olardyń 17 myńy memlekettik tapsyrys aıasynda bilim alady. Bıyl sonymen qatar memlekettik tilde oqytý 45 paıyzdan 65 paıyzǵa artatynyn aıta ketkim keledi. Atap aıtqanda, aqparattyq-modeldengen qurylys jáne jobalaý, medıtsınalyq optıka, medıtsınalyq tehnıkany jóndeý jáne paıdalaný jáne ózge de tehnıkalyq mamandyqtar qazaq tilinde oqytylady», - dedi Áset Isekeshev.
Eske sala ketsek, Astanada búgin Qazaqstan Prezıdenti Nursultan Nazarbaevtyń qatysýymen «Nur Otan» partııasy Saıası keńesiniń keńeıtilgen otyrysy ótip jatyr. Shara barysynda «Nur Otan» partııasyn júıeli túrde jańǵyrtý boıynsha jumys barysy talqylanyp, Qazaqstan Prezıdentiniń bes áleýmettik bastamasyn júzege asyrý baǵytynda qoǵamdyq baqylaýdy uıymdastyrý máseleleri qaralýda.
