Astanada qylmystyq izdeýdiń 95 jyldyǵy aıasynda ótkizilgen spartakıadada Almaty aýdanynyń ІІB bas júldege kólik aldy
ASTANA. 5 qazan. QazAqparat - Búgin Astana qalasy Іshki ister departamentinde qylmystyq izdeýdiń 95 jyldyǵyna oraı saltanatty is-shara bolyp ótti. Bul týraly astana.kz saıtyna qalalyq ІІD baspasóz qyzmetinen habarlady.
Atalǵan mekemeniń akt zalynda saltanatty jaǵdaıda jedel bólimniń úzdik qyzmetkerleri baǵaly syılyqtarmen, gramotalarmen jáne alǵys hattarmen marapattaldy.
«Qylmystyq izdeý qyzmetkerleri qylmyspen kúrestiń aldyńǵy shebinde júrip, ózderiniń memleket pen azamattardy qorǵaý boryshtaryn adal ári batyl atqaryp keledi», - dedi ІІD basshysy Amantaı Áýbákirov.
Budan basqa, bul kúni Qylmystyq izdeý kúnin merekeleý qarsańynda ótken spartakıadanyń qorytyndysy shyǵaryldy. Qalalyq ІІB aýmaqtyq jedel qyzmet qyzmetkerleri sporttyń 6 túrinen baq synasty. Jarys qorytyndysy boıynsha, jalpy komandalyq esepte birinshi orynǵa Almaty aýdanynyń jedel qyzmetkerleri, ekinshi orynǵa Saryarqa aýdanynyń ІІB, úshinshi orynǵa Esil ІІB turaqtady. Jarys jeńimpazy Almaty aýdanynyń ІІB bas júldege kólik aldy. Ekinshi jáne úshinshi oryndarǵa kompıýter men kóp fýnktsıonaldy prınter berildi.
Budan basqa, merekege oraı, Astana qalasy Іshki ister departamentiniń basshysy polıtsııa general-maıory Amantaı Áýbákirov ardagerlermen kezdesti. 3 qazanda A.Áýbákirov ishki ister organdarynyń ardageri Alekseı Vasındy 99 jasqa kelgen týǵan kúnimen quttyqtady. Sonymen qatar, jedel qyzmettiń eńbek sińirgen ardageri Kazıs Juljybaevpen kezdesti. Ardagerlerge syılyq retinde teledıdarlar berildi.
