Astanada qylmysker eki polıtseıdi jaraqattady
«27 aqpan kúni saǵat 22:10-da Astana qalalyq ІІD jergilikti polıtsııa qyzmetiniń jol-patrýldik polıtsııasynyń qyzmetkerlerine ónerkásip aımaǵynda tonaýshylyq jasalǵany týraly habarlama kelip túsken. Qaskúnemderdi anyqtaýǵa baǵyttalǵan jumystardy júrgizý kezinde ónerkásip aımaǵynyń aýmaǵynda ornalasqan qurylys vagonshasynda bolǵan adamdardyń biri qujattardy tekserý barysynda kenetten eki polıtseıge birneshe ret oq atqan», - delingen habarlamada.
Oqıǵa ornyna shuǵyl kelip jetken polıtsııa qyzmetkerleri Qaraǵandy oblysynyń 43 jastaǵy turǵynyn ustap, Astana qalalyq ІІD-niń ýaqytsha oqshaýlaý abaqtysyna qamaýǵa aldy. Ustalǵan er adamnyń buǵan deıin sottalǵany, sonyń ishinde bir asa aýyr qylmys (adam óltirý) jasaǵany anyqtaldy.
Oqıǵa ornyn tekserý barysynda qarý («Nagan» júıesindegi tapansha) anyqtalyp, alyndy. Tıisti saraptamalar taǵaıyndaldy. Atalǵan faktimen QR QK 380-baby («bılik ókiline qatysty zombylyq jasaý), 287-baby («qarýdy zańsyz ustaý»), 24-baptyń 3-99-bólimi («adam óltirýge oqtalý») boıynsha sot aldyndaǵy tergeý amaldary júrgizilýde. Polıtsııa qyzmetkerleri ustalǵan adamnyń qala aýmaǵynda buǵan deıin jasalǵan ózge qylmystarǵa qatysyn tekserýde.
Kóptegen oq jaraqattaryn alǵan jol-patrýldik polıtsııanyń qyzmetkerleri medıtsınalyq mekemege jetkizildi. Ustalǵan er adam polıtsııanyń starshınasy Maral Turǵynbaevqa tórt oq jaraqatyn, al polıtsııa serjanty Erbolat Ryspekovke eki jaraqat salǵan.
Jaraqattanǵan polıtseıler jatqan aýrýhanada Astana qalalyq ІІD-niń bastyǵy, polıtsııanyń general-maıory Amantaı Áýbákirov bolyp, qyzmetkerleriniń hal-jaǵdaıyn bildi. Elordalyq Іshki ister departamenti bastyǵynyń aıtýynsha, polıtseıler men olardyń otbasylaryna jan-jaqty qajetti kómek kórsetiledi.