Astanada qylmys jasaǵan Reseı, Belarýs, Grýzııa jáne Ózbekstan azamattary ustaldy
ASTANA. 26 sáýir. QazAqparat - Bir táýliktiń ishinde astanalyq tártip saqshylary qylmys jasaǵan jaqyn shet elderdiń azamattaryn qolǵa túsirdi.
Elordalyq polıtseıler mamyr aıyndaǵy merekelerdiń qarsańynda kóshelerdegi jáne qoǵamdyq oryndardaǵy quqyqbuzýshylyqtardyń aldyn alý jáne tosqaýyl qoıý úshin 25-27 sáýir aralyǵynda «Quqyqtyq tártip» jedel aldyn alý sharasyn ótkizýde.
Onyń alǵashqy táýliginde bas qalanyń aýmaǵynda qaraqshylyq shabýyl jasaǵan Belorýssııanyń 38 jastaǵy azamaty, buzaqylyǵymen erekshelengen Ózbekstannyń 26 jastaǵy turǵyny, alaıaqtyqpen aınalysqan grýzııalyq jáne esirtki saqtaǵan reseılik qolǵa tústi.
Olar elordada ýaqytsha turǵan. Nazarǵa ilikkenderdiń keıbiri Astana qalalyq ýaqytsha ustaý ızolıatoryna toǵytyldy. Qazirgi tańda tergeý jumystary júrgizilýde.
25-26 sáýirdegi kezekshilik kezinde Ózbekstan Respýblıkasy ІІM izdeý jarııalaǵan, izim-ǵaıym joǵalyp ketken 31 jastaǵy áıel tabyldy. Ol Astana qalasynda ýaqytsha turyp kelgen.
