Astanada qylmys ornyn dál anyqtaıtyn tehnologııa tanystyryldy
ASTANA. QazAqparat - QR Bas prokýratýrasy quqyq qorǵaý komıtetiniń tóraǵasy Qaırat Jaqypbaev qylmys ornyn dál anyqtaıtyn noý-haý jaıly aıtyp berdi, dep habarlaıdy QazAqparat tilshisi.
«Qazir eki júıe negizinde jumys jasaımyz - «táýekelder kartasy» jáne «aqyldy esep». Osy joba sheńberinde «quqyq buzýshylyqtar kartasy» modýlin júzege asyrýdy josparlap otyrmyz. Modýlde «aqyldy torýyl» jobasyn quramyz, sóıtip «quqyq buzýshylyqtar kartasyn» odan ári jetildire túsemiz, «E-kýáger» kamerasyn ıntegratsııalaımyz. Munyń qandaı mańyzy bar? Polıtseılerdiń qylmys izdeý marshrýttaryn anyqtaý úshin qylmys jasalý táýekeli bar aımaqtardy, ýaqytyn jáne basqa da faktilerin kórsetetin modýl qurylady»,- dedi Bas prokratýrada Q.Jaqypbaev áriptesterine.
Ol «Quqyq buzýshylyqtar» júıesin anyqtaý úshin qylmys orny men ýaqyty dál kórsetilgen aqparatty alý asa mańyzdy ekenin atap ótti.
«Qylmys týraly málimetterge súıene otyryp, «quqyq buzýshylyqtar» kartasynyń belgili bir oryn mańynda shoǵyrlanǵanyn kóremiz, ony beıneli túrde «qylmys oshaqtary» dep ataýǵa bolady. Qylmys jaqyn mańdaǵy basqa orynda bolsa, tergeýshiler qylmysty zerttegende, qylmys orny dep sol mańdaǵy úıdi kórsetedi. Mysaly, «Ánshi fontan» janynda qalta urlyǵy oryn alǵanda, karta «Nursaıa» turǵyn úı keshenin kórsetti,- dep atap ótti Bas prokýratýra ókilderi.
Onyń sózinshe, jańa tehnologııalar óte qarapaıym túrde qoldanylatyn bolady.
«Endi tergeýshiler «quqyq buzýshylyqtar» kartasyna kirip, oqıǵa ornyn tańdasa, jańa tehnologııalar qylmystyń ornyn santımetrine deıin dál kórsetip beredi. Sáıkesinshe, bul qalanyń qaýipsizdigin durys josparlaýǵa alyp keledi»,- dep atap ótti Q.Jaqypbaev.
