Astanada quzyrly organ ókilderiniń salaqtyǵynan 400 -den astam azamattyń quny 5 mıllıard teńgeni quraıtyn úıleri zańsyz súrilip, jer telimderi zańsyz alynǵan

Bul týraly búgin Astana qalalyq prokýratýrasynyń Qadaǵalaý, anyqtaý jáne tergeý basqarmasynyń bólim bastyǵy Arman Aqanov málim etti, dep habarlaıdy QazAqparat.

Onyń sózine qaraǵanda, azamattardyń jer telimderi men olardyń

ózge de jeke múlikterin alý - búgingi kúnniń ózekti máselesi ekendigine qaramastan, osyndaı jáıtterdi tekserýmen aınalysatyn kóptegen laýazymdy tulǵalar, qalyptasqan jaǵdaıǵa jetkilikti deńgeıde kóńil bólmeı otyr. Olar tipti bul jaǵdaıǵa atústi qaraıtyn sııaqty. «Naqty faktilerge júginetin bolsaq, 2009 jyly qalada tirkelgen 117 aryz boıynsha nebári 5 qylmystyq is qozǵalǵan. Al qalǵan 112- isi boıynsha is qozǵaýǵa qarsylyq bildirilgen», dedi basqarma bastyǵy.

Onyń sózine qaraǵanda, qurylys nysandaryn buzý áreketterine tekserý júrgizetin quzyrly organ ókilderi qandaı da bir jerdi alý úshin tek ákimdiktiń qaýlysymen nemese sot sheshimimen ǵana shekteledi.

«Al bul qaýlylardyń qanshalyqty zańdy ekendigi jáne materıaldyq shyǵynnyń ornyn jabý, jer telimderin alý tetikteriniń sebep-saldarlary naqtylanbaıdy. «Ádette mundaı jaǵdaılarǵa baılanysty aryzdar bolashaǵy joq materıaldar retinde baǵalanyp, olar boıynsha tıisti tekserý júrgizý jumystary ýchaskelik ınspektorlarǵa júkteledi. Al tergeý jumystary boıynsha tájirıbesi joq ınspektorlar qosymsha tergeý jumystaryna nemquraıly qaraıdy», dedi A. Aqanov.