Astanada kúzgi áskerge shaqyrý naýqany: desant, arnaıy jáne ǵylymı bólimshelerge kimder barady

ASTANA. KAZINFORM – Astanada merzimdi áskerı qyzmetke kúzgi shaqyrý naýqany jalǵasyp jatyr. Qalalyq shaqyrý komıssııasynyń otyrysynda zapastaǵy polkovnık, «Qazaqstan Qarýly Kúshteri ardagerleri» respýblıkalyq qoǵamdyq birlestiginiń ókili Ǵanı Artyqov pen bloger ári jattyqtyrýshy Aıtym Jaqypov jastardy áskerge jaýapkershilikpen qaraýǵa shaqyrdy, dep habarlaıdy elorda ákimdiginiń resmı saıty.

Aıtym Jaqypovtyń aıtýynsha, ásker – árbir jigit ótýi tıis ómir mektebi. Ol jastarǵa bul kezeńge sanaly túrde daıyndalý qajettigin eskertti, ásirese fızıkalyq daıyndyqtyń mańyzdylyǵyna toqtaldy.

«Qazaqstanda daıyndalýǵa barlyq múmkindik bar: fıtnes ortalyqtar, sport keshenderi, klýbtar jumys isteıdi. Eń bastysy – shaqyrý qaǵazyn kútpeı, sportpen shuǵyldanýdy erterek bastaý kerek. Fızıkalyq forma – jeke densaýlyqpen qatar, el qaýipsizdigine qosqan úles. Barlyq bolashaq sarbazdarǵa jattyǵýǵa kirisip, áskerge daıyn bolýdy keńes etemin», – dedi ol.

Jaqypovtyń aıtýynsha, onyń jobalarynan qatysqan jastardyń 90%-y ómirin túbegeıli ózgertken. Kópshiligi marafonshy, jattyqtyrýshy, tálimger atanǵan. Keıbiri 50-200 kelige deıin salmaq tastaǵan.

«Bul tek syrtqy ózgeris emes, minezdiń qalyptasýy. Mundaı adamdar shyn máninde tártipti jáne fızıkalyq turǵydan daıyn. Bul – áskerge qajetti basty qasıet», – dep atap ótti jattyqtyrýshy.

Onyń pikirinshe, qazirgi jastardyń dene belsendiligi tómendep, uzaq otyrý ómir salty kórý, zat almasý jáne jalpy densaýlyqqa keri áserin tıgizip otyr. Al ásker osynyń ornyn toltyryp, negizgi daǵdylardy qaıta qalyptastyrýǵa múmkindik beredi.

«Ásker – bul abyroı úshin emes, Otan aldyndaǵy borysh. Eger sarbaz ózin jaqsy qyrynan kórsetse, ol joǵary oqý ornynda bilimin jalǵastyryp, kásibı jolyn Qorǵanys mınıstrligimen birge josparlaı alady. Bul – áleýmettik lıft», — dedi ol.

Al Ǵanı Artyqovtyń aıtýynsha, qazir elordada shaqyrý naýqanynyń belsendi kezeńi ótip jatyr.

Jastar aldymen medıtsınalyq komıssııadan ótedi, onda olardyń densaýlyǵyna erekshe mán beriledi. Tek tolyqtaı jaramdy dep tanylǵan azamattar ǵana túrli ásker túrlerine jiberiledi.

• Desanttyq-shabýyl jáne arnaıy bólimderge boıy 170 sm-den joǵary, densaýlyǵy men sporttyq daıyndyǵy myqty jigitter irikteledi.

• Jaqsy júzetinder – Áskerı-teńiz kúshterine qabyldanady.

• Joǵary bilimi bar matematıkter men IT-mamandar áýe shabýylyna qarsy qorǵanys bólimderinde jumys istep, zenıttik júıeler men radarlardy basqarady.

• Baǵdarlamashylar men ınjenerler ǵylymı bólimshelerge bólinip, baǵdarlamalyq qamtamasyz etý men aqparattyq júıelerdi damytady.

• Zań fakýltetteriniń túlekteri kóbine Ulttyq ulan qataryna qabyldanady, sebebi bul qurylym quqyq qorǵaý salasyna kadr daıyndaıtyn negizgi baza sanalady.

Ǵanı Artyqov atap ótkendeı, qyrkúıek aıynda shekara qyzmeti men desanttyq bólimder tolyq jasaqtalǵan. Qazan aıynyń basynda teńiz jaıaý áskerleri jasaqtalyp, qazir mehanıkalandyrylǵan, arnaıy jasaq jáne barlaý bólimderi, artıllerııalyq quramalar tolyqtyrylyp jatyr.

Qarashanyń sońyna deıin Ulttyq ulan men TJM qutqarý bólimderine áskerge alý jalǵasady. Bul qurylymdarǵa úmitkerlerge qoıylatyn talaptar joǵary – dene daıyndyǵy men kásibı qabileti qatań baǵalanady.

Jalpy, jyl sońyna deıin elordadan 1 200-den astam jas sarbaz ásker qataryna jóneltilmek.

Aıta keteıik, Aqtaýda bos oryndar jármeńkesinde 35 azamat áskerı qyzmet ótkerýge nıet bildirdi.