Astanada kúzde áskerge shaqyrylǵan sarbazdar Ulttyq ulanǵa attandy
ASTANA. KAZINFORM — Elordadaǵy jınaý pýnktinde 35 astanalyqty áskerı qyzmetke saltanatty túrde shyǵaryp salý rásimi ótti. Azamattar Almaty qalasyndaǵy Ulttyq ulan bólimderinde áskerı qyzmet ótkeredi.
Olardy shyǵaryp salýǵa elorda ákimdiginiń, Qorǵanys mınıstrligi men Ulttyq ulannyń ókilderi, Astana qalasynyń Qorǵanys isteri jónindegi departamentiniń basshylyǵy, Qarýly kúshterdiń ardagerleri, sondaı-aq áskerge shaqyrylýshylardyń týǵan-týystary men jaqyndary qatysty.
Áskerge alynǵan azamattarǵa bul kún erekshe boldy.
Alda áskerı ujym, jaýyngerlik daıarlyq, jaýapkershilik pen jańa mindetter tur. Munyń bári olardyń ómiriniń mańyzdy bóligine aınalary sózsiz.
— Búgin sender eresek ómirge mańyzdy qadam jasap otyrsyńdar. Áskerı qyzmet senderdi sabyrlylyqqa, tártipke jáne bir-birińe qoldaý kórsetýge úıretedi. Áskerı formany abyroımen kıip, komandırleriń men qarýlastaryńdy qurmetteńder. Áskerı mindetterińdi adal atqaryńdar. Árqaısyń Otan aldyndaǵy boryshtaryńdy abyroımen ótep, úıge shyńdalyp, eseıip, jańa ómirlik tájirıbe jınaqtap, aman-esen oralýlaryńa tilektespin, — dedi áskerge jańa alynǵandarǵa arnaǵan sózinde Astana qalasy Qorǵanys isteri jónindegi departamentiniń bastyǵy polkovnık Rýslan Baltemirov.
Áskerı qyzmetke attanǵandardyń qatarynda Bısen Alımat ta bar. Bısen úshin áskerge barý — jańa bilim alyp, áskerı mamandyqty meńgerýge jáne ómirdiń mańyzdy mektebinen ótýge múmkindik.
— Bul qadam — men úshin árıne, óte jaýapty qadam. Degenmen, osy joldan ótýge daıynmyn. Áskerı mamandyqty meńgerip, tártipti ári shyńdalǵan azamat bolǵym keledi. Jaqsy dostar tapqym keledi. Eń bastysy — Otanym men otbasym aldyndaǵy áskerı boryshymdy abyroımen óteý, — dedi ol.
Áskerge shaqyrylýshynyń anasy Gúlmıra Sársenovaǵa da bul kún erekshe áserge toly kún boldy.
— Ár anaǵa áskerge ulyn shyǵaryp salý ońaı emes. Degenmen men búgin ulyma maqtanyshpen qarap turmyn. Áskerı qyzmetin jaqsy ótkerip, myqty ári jaýapty azamat bolyp oralýyna tilektespin. Eń bastysy — densaýlyǵyn saqtap, úıde ony jaqsy kóretin jáne árdaıym kútetin jandar bar ekenin umytpasyn, — dedi G. Sársenova.
Іs-shara sońynda Ulttyq ulannyń áskerı orkestri men ansambli áskerge shaqyrylýshylardyń, olardyń týǵan-týystary men qonaqtardyń aldynda óner kórsetti.
Eske salsaq, bıyl kúzgi áskerge shaqyrý naýqany aıasynda Astanadan Qarýly kúshter qataryna 1400 azamat shaqyrylady.
Budan buryn áleýmettik jelidegi vıdeo shymkenttik barabanshyny Ulttyq ulanǵa alyp kelgenin jazǵanbyz.
