Astanada kúıshi Dına Nurpeıisovanyń 155 jyldyǵyna oraı lektsııa-kontsert ótti
ASTANA. QazAqparat - Ulttyq mýzeıde Dına Nurpeıisovanyń 155 jyldyq mereıtoıyna arnalǵan kúıshi, halyqaralyq jáne respýblıkalyq baıqaýlardyń laýreaty Aıtolqyn Toqtaǵannyń «Bulbul» atty lektsııa-kontserti ótti.
Mýzeıdiń aqparattyq-ımıdjdik qyzmetiniń habarlaýynsha, sharanyń ashylýynda sóz alǵan Ulttyq mýzeı dırektory Darhan Myńbaı kúı anasy Dına Nurpeıisovanyń shyǵarmashylyǵy týraly aıta kele, onyń izin jalǵap kele jatqan Aıtolqyn Toqtaǵan sekildi jastardyń óner jolyndaǵy talpynystaryna sáttilik tiledi.
«Dına - keshegi halyq sazgerleriniń shyǵarmalaryn bizge deıin jetkizgen sheber oryndaýshy. Qurmanǵazynyń shákirti. Qazaqtyń kúıshilik ónerine óshpes iz qaldyrǵan tulǵa. 8-9 jasynan bastap oryndalýy qıyn kúılerdi meńgerip alǵan. Minekı, bizdiń óner jolynda júrgen talantty Aıtolqyndaı jastarymyz osy anamyzdan qalǵan asyl murany jalǵastyrýshy urpaq. Sondyqtan da jas ónerpazdarǵa sáttilik tileı otyryp, shyǵarmashylyq shabyttaryńyzdyń sharyqtaı berýine shyn júrekten tilektespin», - dedi D.Myńbaı.
Shara aıasynda Aıtolqyn Toqtaǵan Dınanyń «Kógentúp», «Jańa bozsholaq», «On altynshy jyl», «Bulbul» t.b. kúılerin naqyshyna keltirip oryndaýmen qatar, olardyń shyǵý tarıhyna da toqtalyp otyrdy. Budan bólek, zalǵa jınalǵan qonaqtar Qurmanǵazy, Táttimbet, Dáýletkereı, Baıjigit, Súgir, Seıtek syndy birqatar halyq kompozıtorlarynyń týyndylaryn tyńdady.
Sondaı-aq,QR Tuńǵysh Prezıdent qory syılyǵynyń ıegeri, ánshi Erlan Rysqalı ánnen shashý shashyp, óner súıer qaýymǵa tamasha kóńil-kúı syılady.
Aıta keteıik, is-sharany Ulttyq mýzeı janynan qurylǵan «Halyq qazynasy» ǵylymı-zertteý ınstıtýtynyń qazaq halqynyń dástúrli mýzykalyq ónerin jańǵyrtý men nasıhattaýǵa arnalǵan «Dástúrli mýzykalyq mura» baǵdarlamasy aıasynda ótti.
