Astanada «Qýyrshaq teatry» ashyldy
ASTANA. QazAqparat - Búgin Astanada «Qýyrshaq teatry» ǵımaratynyń ashylýy ótti. Shara saltanatty túrde tusaýkeser lentasyn kesýden bastalyp, qazaq halyq ertegisi jelisimen «Qańbaq shal» spektakli qoıyldy, dep habarlaıdy elorda ákimdiginiń baspasóz qyzmeti.
Shara barysynda Astana qalasy Mádenıet basqarmasy basshysynyń orynbasary N. Muhambetalına quttyqtaý sóz sóıledi.
- Búgin bárimiz úshin óte qýanyshty kún. Mádenıet basqarmasynyń atynan «Qýyrshaq teatryna» balalar men eresekterdi qýantyp, damyp, jańa ǵımaratta úlken jetistikterge jete berińizder, - dedi ol.
Elordalyq «Qýyrshaq teatry» 2010 jyldan beri jumys istep keledi. Alaıda, jeke ǵımarat bolmaǵandyqtan olar balabaqshalar men mektepterde, uıymdarda, aýrýhanalarda óner kórsetip, qaıyrymdylyq aktsııalarǵa qatysyp júrdi.
«Qýyrshaq teatrynyń» dırektory Toǵjan Hasanǵalıevanyń aıtýynsha, jańa ǵımarat 100 orynǵa eseptelgen. Qýyrshaq teatry osyǵan deıin kóshpeli teatr bolsa da, onyń repertýarynda 12 spektakl bar. Teatr qurylǵaly beri akterlar kóptegen festıvaldarǵa, sonyń ishinde Stambýlda, Mılanda, Dýshanbede, Reseıde ótken sharalarǵa qatysty.
«Qýyrshaq teatry» Astana qalasynyń ákimdigi men qalalyq Mádenıet basqarmasynyń qoldaýymen ashyldy. Merekelik sharaǵa Mádenıet basqarmasynyń ókilderi, «Qýyrshaq teatrynyń» qyzmetkerleri, múgedekter ortalyǵynan, Balalar úıi men mektep janyndaǵy lagerlerden balalar qatysty. Endi balabaqshadaǵy búldirshinderden bastap 14 jasqa deıingi balalar úshin aptasyna 3-4 ret spektakl kórsetiletin bolady.
