Astanada qýyrshaq teatrlarynyń «Quralaı» III Halyqaralyq festıvali ótedi

ASTANA. QazAqparat – Astananyń 25 jyldyǵyna oraı, elordada «Quralaı» qýyrshaq teatrlary arasyndaǵy III Halyqaralyq festıval ótip, 13 teatr óz qoıylymdaryn usynady, dep habarlaıdy QazAqparat qalalyq ákimdiktiń resmı saıtyna silteme jasap.

Elorda kúnine oraı jáne qazaqtyń qýyrshaq ónerin búkil álemge tanymal etý maqsatynda 25-29 maýsym aralyǵynda qala ákimdiginiń mádenıet basqarmasynyń qoldaýymen Astanada qýyrshaqtar teatrlary arasynda «Quralaı» III Halyqaralyq festıval ótedi. Bıyl oǵan Qazaqstan, Qytaı, Perý, Túrkııa, Serbııa, Estonııa, Reseı, Ózbekstan elderinen 13 teatr ujymy qatysady.

Bıylǵy festıval erekshelikteriniń biri – arnaıy nomınatsııalar boıynsha jeńimpazdardy Astana ákimdiginiń «Qýyrshaqtar teatry» janyndaǵy teatr stýdııasynyń alǵashqy túlekteri, ıaǵnı balalar anyqtaıdy.

Festıval 25 maýsym kúni saǵat 9:30-da qatysýshylardyń saltanatty sherýimen ashylady. Sherý «Jastar» saraıynan mýzykalyq jas kórermen teatrynyń ǵımaratyna deıin júredi.

Sol kúni Jas kórermenderdiń mýzykalyq teatrynda aptalyqtyń ashylýyna arnalǵan gala-kontsert ótedi. Onyń alańynda qatysýshylar kórermenderge óz qoıylymdaryn usynady. Sonymen qatar, tanymal ártister men pedagogter akterlik sheberlik pen qýyrshaqtaný boıynsha sheberlik sabaqtaryn ótkizedi.