Astanada qutqarýshylar qysqy jaǵdaılarǵa daıyndyqtaryn synap kórdi
ASTANA. QazAqparat - Astanada «2016-2017 jyldardyń qys mezgilindegi tótenshe jaǵdaılardyń aldyn alý jáne joıý boıynsha áreketterge basqarý organdary men azamattyq qorǵaý júıesiniń memlekettik kúshterin daıyndaý» taqyrybynda «Qys-2016» respýblıkalyq komandalyq-shtabtyq oqý-jattyǵýy ótti, dep habarlaıdy qala ákimdiginiń saıty.
Oqý-jattyǵýdyń maqsaty qys mezgilindegi tótenshe jaǵdaılardyń aldyn alý jáne joıý úshin qalalyq azamattyq qorǵanys júıesiniń daıyndyǵy men múmkindiginiń deńgeıin arttyrý bolyp tabyldy.
Shara 5 oqý alańynda ótti. Eń birinshi oqý alańy «Qalanyń avarııalyq-qutqarý qyzmetteri men jasaqtarynyń sap túzeýi» boldy. Astana qalasynyń jedel áreket etý jasaǵy apattardyń saldaryn joıý, jaraqat alǵandarǵa alǵashqy medıtsınalyq kómek kórsetýge jáne Astana qalasynyń aýmaǵyndaǵy tótenshe jaǵdaı oryndarynan olardy qaýipsiz jerge bir saǵattyń ishinde kóshirý úshin arnalǵan. Astana qalasy TJD bastyǵy azamattyq qorǵaý polkovnıgi B.O.Duzaqbaev qyzmetter tehnıkasy men qyzmetkerleriniń daıyndyǵyn ózi tekserdi.
Oqý-jattyǵýdyń josparyna sáıkes, ekinshi oqý alańynda qutqarýshylar aldynda Kókshetaý-Astana avtobýsynyń jolaýshylaryn JKO saldarynan avarııalyq-qutqarý jumystaryn júrgizý barysynda qaýipsiz jerge shyǵarý mindeti turdy. 112 qutqarý qyzmetine Kókshetaý-Astana baǵdaryndaǵy avtobýs jolaýshylarynan 39-shy shaqyrymda qalyń qardyń qursaýynda qalǵandary týraly qońyraý kelip túsedi.
Úshinshi oqý alańynda «Qarly boranda azamattardy izdeý» josparyna sáıkes, tótenshe jaǵdaılar salasynyń qyzmetkerleri qarly borannan japa shekken, adasqan adamdarǵa kınologtar kómegimen járdemdesti. Qutqarýshylar japa shekkendermen birge «Qabyldaý, jylytý jáne medıtsınalyq, psıhologııalyq kómek kórsetý pýnkteriniń daıyndyǵy» dep atalatyn oqý-jattyǵýdyń tórtinshi alańyna bardy.
Oqý-jattyǵýǵa 37 tehnıka jáne jeke quramnan 120 adam jumyldyryldy.
