Astanada qustardyń qyrylý oqıǵasynan tabıǵatty qorǵaý qyzmeti beıhabar
ASTANA. QazAqparat - Astana ákimdigine qarasty «JasNur» kásiporny Astana qalasynyń turǵyndarynan túsken ótinishti qaraıtyn boldy. Esterińizde bolsa, Astana qalasynyń halyqaralyq áýejaıynyń mańynda qustardyń ólip jatqanyn sýretke túsirgen qala turǵyndary ákim Áset Isekeshevtiń áleýmettik jelidegi paraqshasyna aryz túsirgen edi. QazAqparat agenttigi qala ákimdigine, tıisti organdarǵa saýal jiberip, bul faktiniń mán-jaıyn anyqtaýǵa tyrysty.
Aıta keteıik, «JasNur» kásiporny - qala aýmaǵyndaǵy jabaıy qustar men jan-janýarlardyń taralý aımaǵyna monıtorıng jasaıtyn mekeme. «JasNur» kásipornynyń qyzmetkerleri qyrylyp jatqan qustardy kórmegen eken.
«Biz ólgen qustardy kórgen joqpyz, tıisti sıgnal da kelgen joq, biraq, turǵyndar kórip, sýretke túsirip alǵan bolsa, biz faktini tekseremiz. Degenmen, qustar jappaı qyrylǵan bolsa, biz mindetti túrde biletin edik, sanıtarlyq-epıdemııa stantsııasy, veterınarlar, tótenshe jaǵdaı qyzmetkerleri dabyl qaǵatyn edi. Biraq, sýretke túsirip alsa, oqıǵanyń bolǵany ras qoı. Apta sońyna deıin tekserip, sol jerge baryp, jaýabyn bereıik», - dedi bul oqıǵany QazAqparat tilshisinen estigen «JasNur» kásipornynyń jetekshisi.
Feısbýk áleýmettik jelisinde halyqaralyq áýejaı mańynda ólgen qustardyń sýreti jarııalanǵan edi. Onyń aıtýynsha, áýejaı mańynda qustardyń kóbi ólimshi halde jatqan, sondyqtan, turǵyndar vırýs bar ma dep qaýiptengen. Al, Ardaq esimdi azamatsha Astana áýejaıyna qonǵan soń, qalaǵa bet alǵan kezde, kishkentaı qyzy ekeýi qustardy aıap, arasynan bireýin úıge alyp ketipti. Sebebi, qyzy qustyń qanaty synǵan dep boı bermese kerek. Biraq, qustyń qanaty synbaǵan, úıge ákelgennen keıin bir-eki saǵattan soń, ólip qalǵan, al qyz bala birden aýyryp qalypty. Sondyqtan da Ardaq Áset Isekeshevke saýal joldaǵan eken.
Oqıǵa áýejaı mańynda oryn alǵan soń, halyqaralyq áýejaıǵa da habarlastyq. Kóp jaǵdaıda ushaqtardyń qaýipsiz ushyp-qonýy úshin qustar kedergi jasaıtyny bar.
Biraq, qustardyń qyrylýyna Astana halyqaralyq áýejaıynyń qatysy joq eken. Sebebi, áýejaıdyń bergen aqparatyna súıensek, aerodrom qyzmeti qustardy tek shý shyǵaratyn quraldyń kómegimen úrkitedi eken. «Qustardy úrkitý úshin hımııalyq zattar paıdalanbaıdy» dep sendirdi áýejaı qyzmetkerleri.
Qustardyń qyrylý faktisi boıynsha endi «JasNur» tabıǵatty qorǵaý kásipornynyń jaýabyn kútemiz.
