Astanada kúshti jelden krandar qulap, qurylystarda 2 adam mert boldy, 3-ýi aýrýhanaǵa jetkizildi
ASTANA. 1 tamyz. QazAqparat - Astanada kúshti jeldiń saldarynan krandar qulap, qurylys nysandarynda 2 adam qaza tapty, 3-ýi aýrýhanaǵa jetkizildi.
Bul týraly QR TJM-niń baspasóz qyzmeti habarlady.
Esil aýdanynda. Eńbekshiler kóshesi boıynda salynyp jatqan «QR Ult Kóshbasshysy jáne Tuńǵysh Prezıdenttiń kitaphanasy men qory» nysanynda keshe saǵat 16.05-te kúshti jeldiń saldarynan qurylys alańyna kran qulady.
Sonyń saldarynan «Sembol» AQ fılıalynyń 35 jastaǵy kranshysy oqıǵa ornynda kóz jumdy.
Óndiris aımaǵynda, «Motıv NS» JShS-niń aýmaǵynda saǵat 16.00-de kúshti jeldiń saldarynan qoımanyń ústine kran qulady.
Sonyń saldarynan «Motıv NS» JShS-niń 64 jastaǵy kranshysy oqıǵa ornynda jantásilim etti. 48,47 jáne 42 jastardaǵy qoımashylar ártúrli jaraqattarmen aýrýhanaǵa jetkizildi.
Tótenshe oryn alǵan jerge QR TJM Shuǵyl qutqarý qyzmetiniń 4 adamy men 1 tehnıkasy jetti.
