Astanada qurylysy aıaqtalýǵa tıis 84 turǵyn úı kesheni bar - qala ákimi

ASTANA. Jeltoqsannyń 3-i. QazAqparat /Gúlmıra Álıakparova/ - Ústimizdegi jyly Astanada úleskerlerdiń qatysýymen salyna bastaǵan 39 nysannyń qurylysy aıaqtaldy, jyl sońyna deıin taǵy 27 turǵyn úıdi salyp bitirý josparlanyp otyr.

Bul týraly búgin «Nur Otan» HDP Astana qalalyq fılıalynda esep bergen qala basshysy Imanǵalı Tasmaǵambetov málim etti, dep habarlaıdy QazAqparat.

«Esterińizge sala keteıin, daǵdarys bastalǵan kezde qalada 37 myń úleskerdiń qatysýymen 227 nysan boldy. 2008 jylǵa qaraı olardyń sany 201-ge, al 2009 jyldyń basynda 128-ge azaıdy. Úkimet pen ákimdiktiń júzege asyryp otyrǵan is-sharalary nátıjesinde búgingi kúni 17,5 myńnan astam úleskerdiń qatysýyndaǵy 84 nysannyń qurylysy aıaqtalýǵa jatady», - dedi ol.

Ákimniń atap ótkenindeı, nysandardyń qurylysyn aıaqtaý úshin qolǵa alynǵan sharalardyń nátıjesinde ústimizdegi jyly 39 nysandy (7890 úlesker), jyl sońyna deıin taǵy 27 nysandy (5396) paıdalanýǵa berý kózdelip otyr.

Aıta keteıik, qazir qurylys sektorynda jalpy tómendeý úderisi baıqalyp otyrǵanymen, pozıtıvti qarqyndar áli de saqtalýda. Máselen, 2007 jyly Astanada turǵyn úı sektorynda 1 mıllıon 151 myń sharshy metr turǵyn úı salynsa, 2008 jyly bul kórsetkish - 1 mıllıon 200 myńǵa jetken, al ústimizdegi jyly 1 mıllıon 250 myń sharshy metrdi iske qosý kózdelip otyr. Onyń 1 mıllıon 107 myńy búginde paıdalanýǵa berildi.