Astanada qurylysy aıaqtalmaǵan 45 problemaly nysan bar - prokýratýra
ASTANA. QazAqparat - Elordada búginde 45 problemaly nysan anyqtaldy. Bul týraly búgin Astanadaǵy baspasóz máslıhatynda elorda prokýratýrasy birinshi basqarmasynyń prokýrory Ánet Nurmaǵambetov málim etti.
«Astana qalasy ákimdiginiń málimeti boıynsha 45 problemaly nysan anyqtaldy. Bul nysandardyń qurylysyna jeke adamdardyń qarjysy tartylǵan jáne osy qurylystar áli de aıaqtalmady», - dedi ol. Ánet Nurmaǵambetovtiń sózine qaraǵanda, qalada sotqa deıingi tergep-tekserýge 14 qylmystyq is engizildi. Bul ister turǵyn úı qurylysyna azamattardyń qarjysyn tartýǵa baılanysty bolyp otyr. Osy oraıda ol QR ІІM Tergeý departamenti senip tapsyrylǵan bóten múlikti ıemdený jáne ysyrap etý faktisi boıynsha «Azbýka jılıa» qurylys kompanııalar tobynyń basshylyǵan qatysty QR Qylmystyq kodeksiniń 189-baby, 4-bóliminiń 2-tarmaǵy boıynsha sotqa deıingi tergeý júrgizilip jatqandyǵyn eske salyp ótti. Sonymen qatar «SheıhKazInvest» JShS basshysy Olga Shnaıder men «Al Barakat Company» JShS basshysy Baqytjan Toıymbetovke qatysty tergeý amaldary júrgizilýde. «Adamdar qurylys kompanııalarymen kelisim jasarda barynsha abaı bolýy tıis. Ózderiniń jınaǵan qarjysyn baspana qurylysyna salar aldynda qurylys júrgizýshilerdiń ruqsat qujattarynyń, jer ýchaskesiniń bar ekendigine kóz jetkizýi kerek. Osy oraıda Astana ákimdiginiń saıtyn nemese qurylys júrgizýshi kompanııanyń qujattaryn aldyn ala bir qarap shyqsa, kóptegen problemalardyń aldyn alýǵa bolar edi», - deıdi Á.Nurmaǵambetov.
