Astanada Quryltaı aıasynda «Qazirgi zamanǵy repatrıatsııa: jaı-kúıi, problemalar» atty taqyrypta dóńgelek ústel otyrysy ótti
Májilis barysynda elimizdiń shar-tarabynan jınalǵan qandastar Іshki ister mınıstrligi Kóshi-qon polıtsııasy komıtetiniń tóraǵasy Hıbratýlla Dosqalıevpen birge kóshi-qon salasyna qatysty ózderin tolǵandyrǵan máseleler tóńireginde pikir almasty. Sondaı-aq olar, kóshi-qon polıtsııasy qyzmetiniń basshysyna Qazaqstanǵa saparlary barysynda kezdesetin kedergiler jóninde baıandap, olardyń sheshilý joldary jóninde oı bólisti.
Otyrys barysynda kóshi-qon jáne qandastarymyzdy elge qaıtarý baǵytyndaǵy sharalardyń jaı-kúıimen tanystyrǵan H.Dosqalıevtiń sózinshe, Qazaqstan TMD kóleminde sheteldegi qandastaryn elge qaıtarý máselesimen táýelsizdigin alǵan ýaqyttan bastap, turaqty túrde aınalysyp kele jatqan jalǵyz memleket. «Egemendiktiń alǵashqy jyldarynda 2-3 myń oralman otbasy kóship kelgen bolsa, 2005-2008 jyldary ár jylda elge kelem deýshi otbasylarǵa beriletin kvotalar sany 15 myńǵa, al sońǵy 3 jylda olardyń sany 20 myń otbasyna jetti. 1991 jyldan bastap elge 300 myńnan astam oralman otbasy qonys aýdardy. Sóıtip qazaq halqynyń sany shetten kelgenderdiń arqasynda 1 mıllıonnan astam qandastarymyzben tolyqty»,-dedi komıtet tóraǵasy.
Onyń aıtýynsha, bala týýdyń ósýi men qazaqtardyń tarıhı Otanyna kelýiniń ótken onjyldyǵynda etnodemografııalyq úılespeshilikter birtindep joıyldy. Kóship kelý úderisin qarjylaı qoldaý sharalary kúsheıdi. Sóıtip emıgratsııa kvotasyn alǵan oralmandarǵa turǵyn úı alý úshin járdemaqy tólenýde. Sondaı-aq kólikke ketken shyǵystar men júk tasymalynyń quny da ótelýde. «Bul maqsatta memleket bıýdjetinen jyl saıyn 16 mıllıard teńgeden astam qarjy bólinýde. Barlyq oblystarda elimizge kóship kelýshilerdi ýaqytsha ornalastyrý oryndary ashylǵan. Osy ýaqytta oralmandardy beıimdeý men ıntegratsııalaý jónindegi 4 ortalyq jumys isteıdi. Olar qandastarymyzǵa quqyqtyq jáne ózge de kóptegen máseleler boıynsha aqyl-keńester beredi»,-dedi H.Dosqalıev
