Astanada Qurmanǵazy orkestriniń 75 jyldyǵyna arnalǵan kontsert boldy

Keshtiń ashylýy barysynda QR Mádenıet jáne aqparat mınıstri Muhtar Qul-Muhammed qazaqtyń alǵashqy kásipqoı kompozıtory jáne folklorshysy Ahmet Jubanovtyń basshylyǵymen Qazaqstanda alǵashqy orkestrdiń qurylý tarıhy týraly áńgimelep berdi. Mınıstrdiń aıtýynsha, orkestrdi qalyptastyrýda halyq aspaptaryn tańdap, olardy bir-birimen úndestirý ońaıǵa túspegen.

M.Qul-Muhammedtiń atap kórsetkenindeı, A.Jubanov qurǵan Qurmanǵazy atyndaǵy orkestr qazaq kúıleriniń jańa orkestrdiń oryndaýda kúı tógýine múmkindik berdi. Osy qajyrly eńbektiń arqasynda ult aspaptary orkestriniń oryndaýynda qazaqtyń dástúrli mýzykasy jańa formada túrlenip, bıikke samǵady.  

Qurmanǵazy atyndaǵy Qazaqtyń memlekettik akademııalyq halyq aspaptary orkestri - ulttyq mýzyka mádenıetiniń maqtanyshy, ulttyq mýzykalyq muramyzdy nasıhattaýshy jáne ony saqtap, búgingi urpaqqa jetkizýshi. Búginde orkestr quramynda 70-ten astam adam qyzmet etedi. Onyń repertýarynda otandyq jáne sheteldik klassık-kompozıtorlardyń 4 myńnan astam shyǵarmalary, olardyń arasynda Qurmanǵazynyń, Dáýletkereıdiń, Táttimbettiń, D.Nurpeıisovanyń, A.Jubanovtyń, M.Tólebaevtyń, L.Hamıdıdiń, Ǵ.Jubanovanyń, E.Brýsılovskııdiń, F.Shýberttiń, M.Glınkanyń, P.Chaıkovskııdiń, I.Glazýnovtyń, V.Bramstyń jáne basqa da ataqty mýzyka sheberleriniń ólmes muralary bar.  

Orkestrdiń mereıtoıyna arnalǵan saltanatty kontsertte Qazaqstan Respýblıkasynyń eńbek sińirgen ártisi Shahımardan Ábilovtiń, sondaı-aq halyqaralyq konkýrstardyń laýreattary Gúlzat Dáýirbaevanyń, Jan Tapınniń, Saltanat Ahmetovanyń, Azamat Jelturǵyzovtyń jáne Meıir Baıneshovtyń oryndaýynda tanymal kompozıtsııalar shyrqaldy.