Ulttyq óner men klassıka: Astanada Qurmanǵazy orkestriniń kontserti ótedi
ASTANA. KAZINFORM – Astanada Qurmanǵazy atyndaǵy Qazaq ulttyq halyq aspaptary orkestriniń gastroldik kontserti ótedi. Bul týraly búgin orkestr dırektory Medet Qýanyshev málimdedi.
Astanadaǵy kontsert Mádenıet jáne aqparat mınıstrliginiń qoldaýymen uıymdastyrylyp otyr. Kontserttiń alǵashqy bóliminde Qurmanǵazy, Dáýletkereı, Táttimbet jáne bıyl 100 jyldyǵy atalyp ótip jatqan Nurǵısa Tilendıevtiń shyǵarmalary oryndalady. Sondaı-aq, Ekinshi dúnıejúzilik soǵys batyry Álııa Moldaǵulovaǵa arnalǵan týyndylar da shyrqalmaq.
Kontserttiń ekinshi bóliminde zamanaýı shyǵarmalar men álemdik klassıka negizindegi týyndylar oryndalady.
Orkestrdiń bas dırıjeri, «Qurmet» ordeniniń ıegeri Abylaı Tilepbergenniń aıtýynsha, bul kontsert - tek gastroldik sapar ǵana emes, ulttyq óner men qazirgi zaman arasyndaǵy rýhanı kópir bolmaq.
Bıyl orkestr ujymy birneshe aýqymdy jobany júzege asyrady. Atap aıtqanda, 17 maýsymda Shymkent qalasynda ótetin «Orkestrler sherýi» jobasy aıasynda úlken mádenı is-sharaǵa qatyspaq. Bul - orkestr úshin mańyzdy jobalardyń biri sanalady.
- Keshegi Kókshetaýdaǵy kontsertimiz - negizgi mıssııamyzdyń, ıaǵnı halqymyzdyń ǵasyrlar boıy qalyptasqan ulttyq mýzykasyn, kúılerin, halyq ánderin jáne aspaptyq týyndylaryn kásibı deńgeıde nasıhattaýdyń jarqyn kórinisi boldy. Qala turǵyndary erekshe yqylaspen qarsy aldy.
Sońǵy bes jylda biz kóptegen iri jobany iske asyrdyq. Almaty qalasynda qatarynan bes jyl boıy kontsertterimiz ótip keledi. Bıyl bul dástúr Shymkent qalasyndaǵy «Qyzǵaldaqtar» saraıynda jalǵasady, - dedi orkestr dırektory Medet Qýanyshev Ortalyq kommýnıkatsııalar qyzmetinde ótken baspasóz máslıhatynda.
Ujym quramynda elimizdiń eń úzdik mýzykanttary eńbek etedi. Orkestr tek dástúrli emes, qazirgi zaman talabyna saı mýzykalyq formattardy da meńgerip keledi. Bul - ulttyq ónerdiń jańaryp, damyp jatqandyǵynyń naqty dáleli.
Aıta ketsek, 2024 jyly halqymyzdyń ulttyq kásibı mýzyka óneriniń qarashańyraǵy, ult rýhanııatynyń shyńy – qazaqtyń aspaptyq-mýzyka mádenıetin álemge tanytyp júrgen Qurmanǵazy atyndaǵy Qazaq ulttyq halyq aspaptar orkestriniń qurylǵanyna 90 jyl toldy.
Birǵanym Álıqyzy