Astanada Qurlyqtyq hokkeı lıgasynyń myqtylary bas qosady
ASTANA. QazAqparat - Qurlyqtyq hokkeı lıgasynyń myqtylary «Barys Arenada» bas qosyp, sportsúıer qaýymǵa kóterińki kóńil kúı syılamaq. Elimizde mundaı deńgeıde shara alǵash ret ótkeli otyr, dep habarlaıdy «Habar 24» telearnasy.
Hokkeı juldyzdarynyń baıraqty básekesin elordalyq jankúıer taǵatsyzdana kútti. El mereıin ústem etetin aıtýly sharaǵa sanaýly kún qalyp otyr. 10 qańtarda Eýrazııa myqtylary Astanada bas qosady.
Sharaǵa qurlyqtyq hokkeı lıgasynda óner kórsetetin 27 klýbtan 48 sportshy qatysady. Deni álemge tanymal. Olar 4 komandaǵa iriktelip, ózara myqtyny anyqtamaq.
Dúbirli dodada elordalyq «Barystan» úsh birdeı oıynshy baq synamaq. Komanda kapıtany Naıdjel Doýs, qorǵaýshy Kevın Dalman men qurlyqtyq hokkeı lıgasy úzdikteriniń biri - shabýylshy Lınden Veı. Qazir jigitter qyzý daıyndyq ústinde.
