Astanada qurylysy 11 jylǵa sozylǵan turǵyn úı kesheni aıaqtaldy
ASTANA. KAZINFORM - Astanada qurylysy 11 jylǵa sozylǵan taǵy bir nysan aıaqtaldy. «Future home» kóppáterli turǵyn úı kesheniniń qurylysy 2013 jyly bastalǵan. Nysannyń ózi 2017 jyly problemaly dep tanyldy. Úleskerler sany – 200-ge jýyq otbasy. Bul týraly elorda ákimi Jeńis Qasymbek Instagram-daǵy paraqshasynda jazdy.
Nysandy EQK-ge ótkizý kezinde 4 jáne 7 qabattary ǵana salynǵan. Bul úıdi aıaqtaý úshin kóptegen júıeli jumys, onyń ishinde ınjenerlik jeliler boıynsha da jumystar júrgizildi. Búgin tórt bloktyń turǵyndaryna páter kilti tabystaldy. Al besinshi bloktyń úleskerleri jaqyn arada baspanaly bolady.
«Osyǵan deıin memlekettiń qoldaýynyń arqasynda qurylysy uzaqqa sozylǵan 140-tan astam turǵyn úı kesheni aıaqtaldy. Osylaısha 15,5 myńǵa jýyq úlesker otbasynyń problemasy sheshildi. Bıylǵa qurylysy uzaqqa sozylǵan 10 úı qalady. Olardy osy jyldyń 1-2 toqsanynda aıaqtaımyz. Árbir nysan boıynsha qadamdyq is-sharalar jospary bar. Qurylysy uzaqqa sozylǵan nysandardyń aıaqtalýy Memleket basshysynyń baqylaýynda», - dep jazdy elorda ákimi.
Foto: gov.kz
