Astanada qurylys uıymdaryna 11,6 mln teńge aıyppul salyndy – Zańsyz qurylysty qalaı anyqtaýǵa bolady

ASTANA. KAZINFORM – Astanada qurylysy uzaqqa sozylǵan 150 úıdiń 112-si paıdalanýǵa berildi. Bul týraly qalalyq orta sapasy jáne baqylaý basqarmasynyń basshysy orynbasarynyń mindetin atqarýshy Shapaǵat Taýpyqov aıtty.

Onyń aıtýynsha, 2019 jyly elordada 150-ge jýyq problemalyq nysan boldy, shamamen 16 myń úlesker boldy.

«2022 jyly 12 myńǵa jýyq úleskerdiń máselesi sheshilip, 118 úıdiń qurylysy aıaqtaldy. Memleket basshysynyń 2023 jyly qalǵan 16 obektiniń qurylysyn aıaqtaý jónindegi tapsyrmasyna sáıkes, búginde 7 nysanda 3,6 myńǵa jýyq úleskerge kilt berildi. Qalǵan 9 obektide qurylys jumystary, aýmaqty abattandyrý jumystary júrgizilýde», - dedi Sh. Taýpyqov Astana kommýnıkatsııalar qyzmetinde ótken brıfıngte.

Basqarma 2018 jyldan bastap qazirgi ýaqytqa deıin jalpy somasy 145 mln teńgege 219 qurylys uıymyn ákimshilik jaýapqa tartqan.

Onyń ishinde 2024 jyly 13 uıymǵa 11,6 mln teńge aıyppul salynǵan.

«Ákimdiktiń resmı saıtynda azamattardy aqparattandyrý maqsatynda úleskerlerdiń aqshasyn tartý quqyǵynsyz salynyp jatqan nysandardyń jańartylǵan tizimi únemi jarııalanyp otyrady, jáne qalanyń jarnamalyq konstrýktsııalarynda, LED-ekrandarynda taqyryptyq beınematerıaldar shyǵady», - dep tolyqtyrdy spıker.