Astanada qurylys kompanııasy qyzmetkerleri 7,9 mlrd teńge jymqyrdy degen kúdikke ilindi

ASTANA. KAZINFORM – QMA Astana qalasy boıynsha departamenti «Qyran» turǵyn úı keshenindegi jyljymaıtyn múlikti satý jeleýimen aqsha qarajatyn jymqyrý shemasyn uıymdastyrǵan qurylys kompanııasynyń qyzmetkerlerine qatysty tergeý júrgizip jatyr. 

Satý keńsesinde qurylys kompanııasy atynan satyp alýshylarǵa kompanııanyń jyljymaıtyn múlik nysandaryna menshik quqyǵy bar ekenin «dáleldeıtin» maketter, tehnıkalyq pasporttar, senimhattar men anyqtamalar kórsetilgen.

Azamattarǵa páterlerdi, kommertsııalyq úı-jaılardy jáne parkıng oryndaryn naryqtyq baǵadan tómen satyp alý usynylyp, mámilelerdiń tolyq zańdy ekeni aıtylǵan.

Alaıda satyp alý-satý sharttaryn jasaý ornyna kúdiktiler brondaý sharttaryn, kepil týraly kelisimder men aldyn ala sharttardy rásimdegen. Bul qujattar memlekettik tirkeýge jatpaıdy jáne satyp alýshylarǵa menshik quqyǵyn bermeıdi.

— Jábirlenýshiler tólemdi qolma-qol jáne qolma-qol aqshasyz túrde shemanyń qatysýshylarynyń jeke shottaryna aýdarǵan. «International Invest Company IIC» JShS-niń býhgalterlik jáne banktik qujattarynda bul operatsııalar kórsetilmegen. Nátıjesinde azamattardyń 3,8 mlrd teńgeden astam qarajaty jymqyrylǵan, — delingen habarlamada.

Budan bólek, kúdiktiler qurylys kompanııasynyń qarajatyn urlaýǵa baǵyttalǵan ekinshi alaıaqtyq shemany júzege asyrǵan.

Qurylys kompanııanyń atynan klıenttermen jalǵan satyp alý-satý sharttaryn jasap, obektilerge menshik quqyqtaryn tirkegen, alaıda satýdan túsken qarajat kompanııanyń kassasyna túspegen.

— 76 jyljymaıtyn múlik obektisiniń satylýynan 4,1 mlrd teńge jymqyrylǵan. Osylaısha azamattarǵa jáne kompanııaǵa keltirilgen jalpy zalal 7,9 mlrd teńge. Sot sanktsııasymen 94 páterge, 51 parkıng ornyna, 8 kommertsııalyq úı-jaıǵa jáne bir avtokólikke tyıym salyndy, — delingen QMA habarlamasynda.

Úsh kúdiktige qatysty qamaýǵa alý túrindegi bultartpaý sharasy qoldanyldy.

QPK-niń 201-babyna sáıkes ózge aqparat jarııa etýge jatpaıdy. 

Aıta ketelik ІІM prekýrsorlardyń zańdy aınalymyn baqylaýdy kúsheıtken edi.