Astanada qurylys alańynda kran aýdarylyp, jumysshy qaza tapty

ASTANA. KAZINFORM — Astana qalasy Turar Rysqulov kóshesi 18/5 úı mekenjaıynda ornalasqan «Abyroı» turǵyn úı kesheni aýmaǵynda qatty jel saldarynan kran aýdarylyp qaldy.

Oqys oqıǵanyń beınejazbasy áleýmettik jelide tarady. Jelidegi aqparatqa sáıkes 18 shilde saǵat 20:07 shamasynda jeldiń kenetten qatty soǵýy saldarynan qurylys alańynda munaralyq kran aýdarylyp, bir jumysshy til tartpaı ketken.

Posmotret etý pýblıkatsııý v Instagram

Pýblıkatsııa ot Danııar Kaparov (@astana_pokazhet_)

Osy oqıǵaǵa qatysty BI Group qurylys kompanııasy túsinikteme berip, kran tehnıkalyq jaǵynan durys kúıde bolǵanyn málimdedi.

— Kran tehnıkalyq jaǵynan durys kúıde boldy jáne barlyq tehnıka sııaqty jumys bastalǵanǵa deıin mindetti tekserýden ótti. Oqıǵa bolǵan kezde kran operatory jumysty aıaqtap, jumys kúni aıaqtalýǵa jaqyn boldy. Ókinishke qaraı, krannyń qulaýy saldarynan bir adam qaza boldy. Tótenshe jaǵdaı qyzmetteriniń daýyl týraly eskertýi oqıǵa bolǵannan keıin ǵana keldi. Biz qaza bolǵan adamnyń týystary men jaqyndaryna shyn júrekten kóńil aıtamyz, — delingen kompanııa taratqan habarlamada.

Budan bólek BI Group qurylys kompanııasy qaza bolǵan adamnyń otbasyna jan-jaqty kómek kórsetiletinin atap ótti.

— Qazirgi tańda oqıǵa ornynda tótenshe jaǵdaı qyzmetteri men tıisti mamandar jumys istep jatyr. Biz qaza bolǵan adamnyń otbasyna jan-jaqty kómek kórsetip, tergeý nátıjeleri boıynsha barlyq qajetti sharalardy qabyldaımyz. Qaza bolǵan adam merdiger uıymnyń qyzmetkeri bolǵan, — dep atap ótti qurylys kompanııasynan.

Buǵan deıin Aqmola oblysynda montajdaý jumystary kezinde bolǵan apattan eki adamnyń qaza tapqanyn jazǵanbyz.