Astanada qurylys alańynan 1,2 mln teńgeniń kabelin qoldy qylǵan kúdikti ustaldy
ASTANA. KAZINFORM — Astana polıtsııasynyń qyzmetkerleri qurylys nysanynan iri kólemde múlik urlaǵan kúdiktini anyqtady.
Anyqtalǵandaı, 34 jastaǵy er adam tańǵy ýaqytta Qaldaıaqov kóshesinde ornalasqan qurylys alańyna kelip, erkin qoljetimdilikti paıdalaný arqyly betondy jylytýǵa arnalǵan kabeldi jasyryn jymqyrǵan.
Urlanǵan múliktiń jalpy quny — 1 mıllıon 200 myń teńge.
— Qurylys nysanynyń jaýapty tulǵasy keltirilgen shyǵyn boıynsha polıtsııaǵa aryzdanǵan. Oqıǵaǵa baılanysty jedel-izdestirý is-sharalaryn júrgizgen polıtsııa qyzmetkerleri qurylys alańyndaǵy jáne oǵan jaqyn aýmaqtaǵy beınebaqylaý kameralarynyń jazbalaryn zerdeleý nátıjesinde kúdiktiniń jeke basyn anyqtady. Keıin ol ustalyp, polıtsııa bólimine jetkizildi, — delingen habarlamada.
Bul derek boıynsha sotqa deıingi tergep-tekserý amaldary júrgizilip jatyr.
Polıtsııa qurylys nysandarynyń ıelerine baǵaly qurylys materıaldaryn kúzetiletin jerde saqtaýdy, aýmaqty beınebaqylaý júıelerimen jáne jaryqtandyrý quraldarymen jabdyqtaýdy usyndy. Sonymen qatar polıtsııa azamattarǵa bótenniń múlkin zańsyz ıemdený qylmystyq jaýapkershilikke ákep soǵatynyn eskertti.
Eske salaıyq, buǵan deıin Astanada er adam buryn ózi kúzetken nysannan 21 mln teńgeniń kabelin urlap ketkenin habarlaǵan edik.
