Astanada qurylys alańdarynda tekserý kúsheıedi
ASTANA. KAZINFORM – Qazaqstanda qurylys salasyndaǵy óndiristik jaraqattyń aldyn alý sharalary kúsheıtiledi. Negizgi maqsat – jazataıym oqıǵalarǵa jol bermeý jáne jumysshylardyń qaýipsizdigine qurylys kompanııalary men bas merdigerlerdiń jaýapkershiligin arttyrý, dep habarlaıdy Eńbek jáne halyqty áleýmettik qorǵaý mınıstrligi.
Elordada memlekettik eńbek ınspektorlary qurylys nysandaryndaǵy eńbek qaýipsizdigi jáne eńbekti qorǵaý talaptarynyń saqtalýyn baqylaýǵa aldy.
Mınıstrlik málimetinshe, Tótenshe jaǵdaılar departamenti, Polıtsııa departamenti jáne Kásipodaqtar ortalyǵymen birlesip qurylys alańdarynda turaqty túrde kóshpeli monıtorıng pen profılaktıkalyq is-sharalar ótkiziledi.
– Negizgi maqsat – jazataıym oqıǵalarǵa jol bermeý, eńbek qaýipsizdigi talaptarynyń buzylýyn der kezinde anyqtaý jáne jumysshylardyń qaýipsizdigine qurylys kompanııalary men bas merdigerlerdiń jaýapkershiligin arttyrý. Óndiristik jaraqat qaýpi joǵary nysandar men jumystarǵa erekshe nazar aýdarylady, – delingen habarlamada.
Sonymen qatar mınıstrlik zańbuzýshylyqtardyń aldyn alý maqsatynda Astanadaǵy qurylys kompanııalaryna eńbek qaýipsizdigine ishki baqylaýdy kúsheıtý jóninde usynymdar joldady.
Atalǵan jumys qurylys salasyndaǵy shamamen 20 myń sýbektini qamtıdy.
Aıta keteıik, Shymkentte óndiristegi jazataıym oqıǵalardan 3 adam qaza taýyp, 14-i aýyr jaraqattandy.
