Astanada kúres túrlerinen álem chempıonatynyń resmı sımvoldary tanystyryldy
ASTANA. KAZINFORM – Astanada ótetin kúres túrlerinen 2026 jylǵy álem chempıonatynyń resmı logotıpi, maskoty men medali tanystyryldy. Bul týraly Qazaqstan kúres federatsııasy bas hatshysy Gúlbaram Qulahmetova málimdedi.
Kúres túrlerinen eresekter arasyndaǵy álem chempıonaty 24 qazan men 1 qarasha aralyǵynda elordadaǵy Barys Arena sport kesheninde ótedi.
– Búgin biz «Astana-2026» álem chempıonatynyń resmı logotıpin tanystyryp otyrmyz. Onyń vızýaldy sheshiminde kúreske tán qozǵalys pen dınamıka, tutastyq jáne ulttyq órnek elementteri bir kompozıtsııada biriktirilgen, – dedi Gúlbaram Qulahmetova.
Onyń aıtýynsha, logotıptegi ulttyq órnekter chempıonattyń Qazaqstanda ótetinin aıqyndasa, kók túster eldiń vızýaldy bolmysymen úndesedi. Sonymen qatar chempıonattyń resmı maskoty – Muzbalaq tanystyryldy. Maskot retinde qyran qustyń tańdalýy qazaq dúnıetanymyndaǵy onyń erkindik, bıiktik, kúsh, qyraǵylyq jáne batyldyq sımvoly ekenimen baılanysty.
Sondaı-aq álem chempıonatynyń basty marapattarynyń biri – resmı medal tanystyryldy. Onyń dızaınynda ulttyq oıý-órnek, qyran beınesi jáne chempıonattyń negizgi vızýaldy elementteri biriktirilgen.
– Astanaǵa 1000-nan astam sportshy keledi, biraq olardyń árqaısysynyń armany – álem chempıony atanyp, osy medalǵa qol jetkizý. Birneshe aıdan keıin dál osy medaldar álemniń úzdik balýandarynyń moınyna taǵylady, al olardyń sporttyq tarıhynda «Astana-2026» ataýy qalady, – dedi ol Ortalyq kommýnıkatsııalar qyzmeti alańynda.
Federatsııa ókiliniń aıtýynsha, chempıonattyń aqparattyq naýqany tek jarysty tanystyrýmen shektelmeıdi. Negizgi maqsattardyń biri – sheteldik sportshylar men jankúıerlerdiń Qazaqstanǵa kelmeı turyp-aq Astanaǵa qyzyǵýshylyǵyn arttyrý.
Osyǵan baılanysty qala keńistigin, digital-ekrandardy, sport arenasy men jankúıerler aımaqtaryn birtutas vızýaldy stılde bezendirý josparlanǵan.
Budan bólek, UWW-men birlesip jaryq, dybys, mýzyka, sportshylardy tanystyrý, ekrandyq kontent jáne arenadaǵy jalpy atmosfera boıynsha jańa tásilderi ázirlenip jatyr.
Eske sala keteıik, kúres túrlerinen álem chempıonaty 24 qazan men 1 qarasha aralyǵynda Astanada ótedi. Jarys baǵdarlamasyna grek-rım, áıelder jáne erkin kúres túrleri kiredi.
